Ötən ilin sonunadək Qarbağ Dirçəliş Fondunun ianələrdən topladığı vəsaitin böyük hissəsi dolayı yolla dövlət büdcəsi kəsirinin maliyyələşdirilməsinə xidmət edib.
Qarabağ Dirçəliş Fondu gəlirlərini və xalis mənfəətini - AÇIQLADI
2022-ci ilin sonuna olan məlumata görə, Qarbağ Dirçəliş Fondunun qiymətli kağızlara (Maliyyə Nazirliyinin istiqrazlarına) investisiyaları 664 milyon 894 min manat təşkil edib. Maliyyə Nazirliyinin istiqraz buraxılması yolu ilə vəsait cəlb etməsində əsas məqsəd dövlət büdcəsi kəsirinin maliyyələşdirilməsidir.
FED.az Qarbağ Dirçəliş Fondunun maliyyə hesabatlarına xəbər verir ki, 2022 Fondun dövlət istiqrazlarına investisiyaları 347 milyon 253 min manat və ya 2,1 dəfə artıb. 2021-ci ilin sonunda Fondun dövlət istiqrazlarına investisiyaları 317 milyon 641 min manat təşkil etmişdi.
Qarbağ Dirçəliş Fondu bildirib ki, Fond ianələrdən əldə olunan vəsaitin bir qismini Azərbaycan Respublikası Maliyyə Nazirliyinin dövlət istiqrazlarına yerləşdirməklə 34 milyon 454 min manat əlavə gəlir əldə edib (2021-ci il ərzində Fond 9 milyon 199 min manat maliyyə gəliri əldə edib).
Ötən il Qarbağ Dirçəliş Fondunun Qarabağda bərpa işləri ilə əlaqədar layihə xərcləri 1 milyon 421 min manat təşkil edib. Ötən ilin sonunda Fondun 1 milyard 232 milyon manatdan çox kapitalı olub.
Xəbər verdiyimiz kimi, Qarabağ Dirçəliş Fondunun cəmi gəlirləri 2021-ci ildə 901 milyon 405 min manat ikən, 2022-ci ildə 348 milyon 974 min manata düşüb (552 milyon 431 min manat və ya 61,3% azalıb). Səbəb ianələrin 2,8 dəfə azalaraq 892 milyon 206 min manatdan 314 milyon 520 min mnata düşməsi ilə əlaqədardır.
Qarabağ Dirçəliş Fondu 2022-ci ili 342 milyon 816 min manat xalis mənfəət ilə başa vurub. Fond 2021-ci ili 888 milyon 343 min manat xalis mənfəət ilə bağlamışdı. Beləliklə, ötən il Fondun xalis mənfəəti 61,4% və ya 545 milyon 527 min manat azalıb.
Maliyyə Nazirliyi istiqrazları dövlət büdcəsi kəsirinin maliyyələşdirilməsi və dövlət qiymətli kağızlar bazarının inkişafının dəstəklənməsi məqsədilə buraxılır. 2023-cü ilin 7 ayı ərzində (yanvar-iyul) Azərbaycan Maliyyə Nazirliyi dövlət istiqrazlarının yerləşdirilməsi yolu ilə yerli investorlardan 1 milyard 265 milyon 91 min manat cəlb edib.Böyük hissəsi faiz ödənişi qarşılığında cəlb edilmiş bu vəsait ötən ilin eyni dövrü ilə müqayisədə 538 milyon 203 min manat və ya 74% çoxdur. Ötən ilin 7 ayında Maliyyə Nazirliyi dövlət istiqrazlarının yerləşdirilməsi yolu ilə 726 milyon 888 min manat cəlb etmişdi. 2023-cü ilin 1-ci yarısının yekununda dövriyyədə olan dövlət istiqrazlarının 28,5 faizi 1 illik, 54 faizi 2 və 3 illik,17,5 faizi isə 5 və 7 illik dövlət istiqrazlarının payına düşmüşdü.
Qeyd edək ki, Azərbaycan Respublikasının Prezidenti İlham Əliyevin 4 yanvar 2021-ci il tarixli Fərmanı əsasında yaradılan Qarabağ Dirçəliş Fondu Azərbaycan Respublikasının işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyinin göstərilməsini və sərmayələrin cəlb edilməsini, bu sahədə dövlət-özəl tərəfdaşlığının inkişaf etdirilməsini, habelə görülən işlərlə bağlı ölkə daxilində və ölkə xaricində informasiya təminatını, maarifləndirmə və zəruri təşviqat işlərini həyata keçirən publik hüquqi şəxsdir.
