Müşahidələr göstərir ki, Mərkəzi Bankın uçot faiz dərəcəsinin digər bazar faizlərinə təsiri zamanla daha da güclənir. Belə ki, 2025-ci ilin iyul və dekabr aylarında faiz dəhlizinin parametrləri 0.5 f.b. azaldılmış və AZIR indeksi bu dəyişikliyə çevik reaksiya vermişdir. AZIR indeksinin ortaçəkili səviyyəsi 2024-cü ilin dekabr ayı ilə müqayisədə 2025-ci ilin dekabr ayında 0,95 f.b. azalmışdır.
Uçot dərəcəsi aşağı salındı - Kreditlər də ucuzlaşdı - MƏRKƏZİ BANK
FED.az biznes və maliyyə xəbərləri portalı xəbər verir ki, bu, Mərkəzi Bankın Pul Siyasəti İcmalının Fevral - 2026 sayında bildirilir.
Qeyd edilib ki, sözügedən azalma dövlət qiymətli kağızları bazarında da öz əksini tapmışdır. Gəlirlilik əyrisinin bütün seqmentlərində 2024-cü ilin dekabr ayının sonu ilə müqayisədə 2025-ci ilin dekabr ayının sonunda azalma müşahidə olunmuşdur. Belə ki, geri ödəmə müddəti 3 aylıq istiqrazlar üzrə gəlirlilikdə 1.61 f.b., 1 illik istiqrazlar üzrə 1.8 f.b., 4 illik istiqrazlar üzrə isə 2.84 f.b. azalma qeydə alınmışdır.
Uçot dərəcəsinin dəyişimi depozit və kredit faizlərinə də müəyyən qədər təsir etmişdir. Belə ki, 2025-ci ilin ikinci yarısından başlayaraq manatla yeni depozitlərin və yeni verilmiş kreditlərin faizlərində azalmalar müşahidə edilmişdir.
Hesabat ilində banklararası bazarın təminatsız seqmenti üzrə əməliyyat fəallığı yüksək olaraq qalıb. Belə ki, 2025-ci il ərzində Blumberq ticarət sistemində banklar arasında ümumi həcmi 65.4 mlrd. manat olan 3661 ədəd əqd bağlanmışdır. Bu əməliyyatların cəmi həcminin 95%-i 1-3 günlük əqdlər hesabına formalaşmışdır.
