Qara Dəniz Ticarət və İnkişaf Bankı (BSTDB) tərəfindən Azərbaycana bankın əlavə kapitallaşmasında iştirak etmək təklif olunub.
FED.az xəbər verir ki, bu barədə Maliyyə Nazirliyindən məlumat verilib.
Bildirilib ki, 1 oktyabr 2021-ci il tarixində Qara Dəniz Ticarət və İnkişaf Bankının Rəhbərlər Şurasının növbədənkənar toplantısında Bankın abunə kapitalının artırılmasına dair qərar qəbul edilib. Qərar səs çoxluğu, xüsusilə də Bankın ən iri səhmdarları olan Türkiyə, Rusiya və Yunanıstanın dəstəyi ilə qəbul olunub. Səsvermə zamanı bəzi daha az səhmə və müvafiq olaraq səsə malik səhmdarlar (o cümlədən, Azərbaycan) bitərəf qalıb.
Qəbul edilmiş qərara əsasən bankın abunə kapitalı 816 milyon avro artırılaraq, 2,3 milyard avrodan 3,1 milyard avroya qaldırılır və hər bir üzv ölkəyə Qara Dəniz Ticarət və İnkişaf Bankının kapital artımında iştirakı onun bu gün Bankın kapitalında mövcud payının xüsusi çəkisinə mütənasib şəkildə həyata keçirilməsi təklif edilir. Bu artımın ödənilən hissəsi 245 milyon avro təşkil edir. Ödəniş üzv ölkələr tərəfindən 8 il ərzində (2023-2030-cu illər) bərabər hissələrlə həyata keçirilməlidir. Bankın yeni səhmlərinə abunə yazılışı ilə bağlı hər bir üzv ölkə 12 ay ərzində Banka qərarını bildirməlidir.
BSTDB Azərbaycana hazırda Bankın səhm kapitalında sahib olduğumuz paya mütənasib, yəni artırılan kapitalın 5 %-i təklif olunur. Bu halda ölkəmiz tərəfindən 12,31 milyon avro məbləğində vəsaitin 8 il ərzində bərabər hissələrlə (ildə 1,539 milyon avro) ödənilməsi gözlənilir.
Göstərilən müddət ərzində məsələyə dair ölkə qanunvericiliyinə uyğun şəkildə müvafiq müzakirələr aparılacaq və yekun qərar Banka bildiriləcəkdir.
Qeyd edək ki, hazırda BSTDB-nin elan olunmuş kapitalı 3,45 milyard avro, abunə olunmuş kapitalı 2,289 milyard avro, ödənilmiş kapitalı isə 0,687 milyard avrodur.
BSTDB - Qara Dəniz İqtisadi Əməkdaşlıq Təşkilatının 11 dövlətini birləşdirən beynəlxalq təşkilatdır. Təşkilatda pay bölgüsü belədir: Türkiyə, Rusiya və Yunanıstan - hərəyə 16,5 %, Rumıniya - 14 %, Ukrayna və Bolqarıstan - hər biri 13,5 %, Azərbaycan - 5 %, Albaniya - 2 %, Ermənistan - 1 %, Gürcüstan və Moldova - hər biri 0,5 %. Bank Qara dəniz regionu ölkələri arasında iqtisadi əməkdaşlığı, ticarəti və əməkdaşlığı inkişaf etdirməyi hədəfləyir.
Bankın Azərbaycanda 37 layihə üzrə portfeli 482 milyon avro təşkil edir. (Report)
