İcbari Tibbi Sığorta üzrə Dövlət Agentliyinin idarə olunan sərbəst maliyyə vəsaitlərinin investisiyası ilə bağlı qanunvericilik tələblərini pozduğu müəyyən edilib.
Hesablama Palatası İcbari Tibbi Sığorta Fondunda nöqsanlar aşkarlayıb
FED.az xəbər verir ki, bu barədə Hesablama Palatası bildirir.
Məlumata görə, 2022-ci ilin sonuna investisiya edilmiş vəsaitin məbləği 462 milyon manat təşkil edib, 2023-cü ildə bu, 814 milyon manat artaraq 1 milyard 276,4 milyon manat, 2024-cü ildə isə 175,3 milyon manat artaraq 1 milyard 451,7 milyon manat olub. Agentliyin investisiya fəliyyətini tənzimləyən hüquqi aktın tələbinə bəzi hallarda tam əməl etməməsi 31.12.2024-cü tarixə depozitlər cəmi investisiya edilmiş sərbəst maliyyə vəsaiti payının hüquqi aktlarla müəyyən edilmiş həddən çox olmasına gətirib çıxardıb.
Dövlət büdcəsindən səhiyyə sahəsində proqram və tədbirlərə ayrılmış vəsaitin bir hissəsi, bəziləri üzrə isə böyük hissəsi və ya tam məbləğdə həmin ildə icra olunmasa da, Agentliyin geri qaytarması səbəbindən bu vəsaitlər düzgün olmayaraq qalıq məbləğinə daxil edilmiş və investisiya fəaliyyəti çərçivəsində istifadə olunub.
Əks-repo əməliyyatlarının daha uzun müddətə həyata keçirilməsi daha əlverişli investisiya alətlərinin geniş istifadəsini məhdudlaşdırmaqla 2023-cü ildə investisiya fəaliyyətindən əldə edilmiş xalis mənfəətin 2024-cü illə müqayisədə 2 dəfədən az olmasına təsir göstərib, hər iki ildə investisiya gəlirlərinin mühasibat uçotunda düzgün əks etdirilməməsi maliyyə hesabatlarının tərtib edilməməsi fonunda bu hesabatlarda təhriflərin formalaşmasında riskləri formalaşdırıb.
Maliyyə hesabatında ciddi uyğunsuzluq tapılıb
İcbari Tibbi Sığorta Fondunun 2023 və 2024-cü illər üzrə gəlir və xərcləri üzrə maliyyə hesabatlarında ciddi uyğunsuzluqlar müəyyən edilib.
Bu barədə Hesablama Palatasının 2025-ci ilin İş Planına əsasən həyata keçirilmiş audit tədbirinin nəticələrində bildirilir.
Audit zamanı müəyyən olunub ki, Fondun təqdim etdiyi illik hesabatlarda həm gəlir, həm də xərclər tam əks olunmayıb. Eyni zamanda, əvvəlki illərin xərcləri düzgün tanınmayıb. Bu cür uyğunsuzluqlar isə icmal büdcənin göstəricilərinin təhrifinə səbəb olub. (Report)
