“Fitch Ratings” beynəlxalq reytinq agentliyi 2023-2024-cü illərdə Azərbaycanda ÜDM-in ildə orta hesabla 2,1% artacağını proqnozlaşdırır.

“Fitch” Azərbaycanın reytinqini “BB+” səviyyəsində təsdiqləyib - PROQNOZ

FED.azi “Fitch”in məlumatına istinadən xəbər verir ki, 2022-ci ildə Azərbaycanda ÜDM 4,6% (2021-ci ildə 5,9%) artıb. Ötən il qeyri-neft ÜDM-in artımı 9,1% təşkil edib, neft hasilatının 5,6% azalması nəticəsində neft ÜDM-i 2,7% azalıb ki, bu da qaz hasilatının 7,3% artması ilə qismən kompensasiya edilib.

Agentlik qeyd edir ki, 2022-ci ildə dövlət büdcəsinin profisiti gəlirlərin 27% artması hesabına 2 faiz bəndi artaraq 6%-ə çatıb. “Fitch” 2023-cü ildə dövlət büdcəsinin profisitinin ÜDM-in 4,8%-dək, 2024-cü ildə isə 4,2%-dək azalacağını proqnozlaşdırır.

“Fitch” qeyd edir ki, 2023-cü ilin fevral ayında Azərbaycanda inflyasiya (12 aylıq) 2022-ci ilin oktyabr ayındakı 15,6%-lik pik səviyyədən 14,1%-ə enib ki, bu da istehlak malları üzrə inflyasiyanın 4 faiz bəndi - 17,1%-dək azalması ilə əlaqədar olub.

“Fitch”in qiymətləndirmələrinə görə, 2023-cü ildə Azərbaycanda orta illik inflyasiya 10,3%-dək (2022-ci ildə 13,9% - İF), 2024-cü ildə 7,3%-dək azalacaq.

Azərbaycan hökuməti 2023-cü ildə ÜDM-in artımını 2,7%, 2024-cü ildə 4,1%, orta illik inflyasiyanı isə müvafiq olaraq 6,9% və 4,5% səviyyəsində proqnozlaşdırır. (İnterfaks-Azərbaycan)