Azərbaycan Mərkəzi Bankı (AMB) ölkədə fəaliyyət göstərən maliyyə qurumlarını test etməyə hazırlaşır.
Azərbaycanda maliyyə xidmətlərinin test məqsədli alışı qaydası təsdiqlənib
Bu, qurumun İdarə Heyətinin təsdiqlədiyi “Maliyyə xidmətlərinin (məhsullarının) test məqsədli alışı Qaydası”nda öz əksini tapıb.
Bəs bu yenilik sektora nə verəcək?
FED.az xəbər verir ki, Azərbaycandakı banklardan birinin İstehlakçıların Müraciət və Şikayətlərinin idarə edilməsi şöbəsinin müdiri, "Azərbaycan Banklar Assosiasiyası" İctimai Birliyinin eksperti Bəhruz Paşayev hesab edir ki, test məqsədli alış bank sektorunda məhsulların və xidmətlərin keyfiyyətini daha da yüksəldəcək: “Banklar özləri də ara-sıra müşahidələr, telefon zəngləri həyata keçirərək, nəticələrə əsasən məhsul və xidmətlərini səviyyələrini davamlı yüksəldirlər. Bu qaydanın qəbul edilməsi ilə isə AMB də test edərək bank xidmətləri və məhsulları, müştərilərlə kommunikasiya sahəsində boşluqları üzə çıxaracaq və nəticələrin dəyərləndirilməsi yekunda istehlakçıların və investorların hüquqlarının qorunması məqsədilə yeni yanaşmalar, həll yolları ortaya qoyacaq, habelə maliyyə xidmətləri və məhsulları üzrə qanunvericilikdə dəyişiklik edilməsi zərurətinin öyrənilməsinə xidmət edəcək”.
Azərbaycandakı investisiya şirkətlərindən birinin direktor müavini Pərvanə Qasımova isə deyir ki, bu qayda AMB-yə maliyyə məhsulları və xidmətləri barədə obyektiv və qərəzsiz məlumat toplamağa, potensial problemləri müəyyən etməyə və uyğunsuzluqları aradan qaldırmaq üçün müvafiq tədbirlər görməyə imkan verəcək: "Düşünmək lazım deyil ki, bu cür üsullar yalnız mənfi halların toplanılmasına xidmət edir. Bu yoxlama üsulu ilə əldə olunan məlumatlar sayəsində maliyyə məhsullarının və xidmətlərinin təkmilləşdirilməsi, optimallaşdırılması baş verəcək. Vətəndaşlarımız ölkə qanunvericiliyinə uyğun olan məhsullardan və xidmətlərdən faydalana biləcək. Bu gün AMB beynəlxalq təcrübəyə əsaslanan, ən müasir üsullarla nəzarət həyata keçirdir. Maliyyə institutlarının fərqli sahələrlə bağlı indeksləşdirilməsi və bunların ictimaiyyətə açıqlanması artıq onları heç bir əlavə sanksiya olmadan daha yaxşı fəaliyyət göstərməyə təşviq edir".
“Maliyyə xidmətlərinin (məhsullarının) test məqsədli alışı Qaydası"ndakı metodları hər bir şirkət rəhbərliyi tətbiq edə bilər. Gizli alıcılarla məhsulların və xidmətlərin keyfiyyətinin qiymətləndirilməsi bazar araşdırması üsuludur", - deyə P.Qasımova əlavə edib. (Report)
