İnnovasiya və Rəqəmsal İnkişaf Agentliyi, “PAŞA Holdinq” Şirkətlər Qrupu və fərdi investorların iştirakı ilə innovasiya ekosisteminin inkişafı üçün böyük əhəmiyyət kəsb edən “Caucasus Ventures” vençur fondu yaradılıb.
FED.az xəbər verir ki, bununla əlaqədar keçirilmiş təqdimat mərasimində dövlət və özəl sektoru təmsil edən tanınmış şirkətlərin təmsilçiləri, investorlar, inkubasiya və akselerasiya mərkəzlərinin məsul əməkdaşları, xarici diplomatlar, beynəlxalq təşkilatların rəhbərləri və media nümayəndələri iştirak ediblər.
Fondun yaradılmasında əsas məqsəd toxum sonrası böyümə və “A” mərhələsində olan startaplara sərmayə yatırmaqdır.
Fond Azərbaycanın innovasiya ekosisteminin inkişafı üçün əlverişli şərait yaradacaq, ölkədə investisiya mədəniyyətinin formalaşmasına təkan verəcək, xarici startaplar və investorların diqqətini yerli bazara cəlb edəcək. Vençur fondu innovasiya ekosistemində maliyyə axınını təmin etməklə startapların inkişafına önəmli töhfə verəcək.
Qeyd edək ki, sözügedən fondun nizamnamə kapitalı 11,3 milyon manat təşkil edir. Vəsaitin 5 milyon manatını dövlət - İnnovasiya və Rəqəmsal İnkişaf Agentliyi yatırıb, “PAŞA Holdinq” fonda 5 milyon manat və fərdi sahibkarlar isə daha 1,3 milyon manat vəsait ayırmaq haqqında razılığa gəliblər.
“Caucasus Ventures” 5 il ərzində Azərbaycan, Gürcüstan, Türkiyə, Orta Asiya və Şərqi Avropa ölkələrindən olan startaplara sərmayə yatıracaq.
Rəqəmsal inkişaf və nəqliyyat naziri Rəşad Nəbiyev bildirib ki, “Caucasus Ventures” innovasiya infrastrukturunun inkişafına, biznes mühitinin optimallaşdırılmasına, xarici investorların ölkəyə cəlb edilməsinə və yerli layihələrin xarici bazarlara çıxarılmasına geniş imkanlar açacaq.
“PAŞA Holdinq”in Baş icraçı direktoru Cəlal Qasımov ümid edib ki, yeni qurulan ilk Vençur Kapital Fondu davamlı olacaq və gələcəkdə ölkədə bu cür fondların sayı artacaq.
“Caucasus Ventures” fondunun rəhbəri Məmməd Kərim qeyd edib: “Startap ekosisteminin mühüm alətlərindən olan vençur maliyyəşməsinin institutlaşması və bunun mövcud qanunvericiliklə bərqərar olması ölkədəki investisiya mühitinin kifayət qədər ciddi layihələrə hazır olduğunu göstərir. Çox şadam ki, bu imkanları sadəcə ölkədəki startaplar üçün deyil, həm də regional startaplar üçün açıq elan etmişik”.
Fondun təsis olunmasına dəstək göstərən fərdi sahibkarlardan Fərid Musayev bildirib: “İnnovativ sektora yatırım imkanları ölkədəki investorlar üçün yeni bir anlayışdır. Düşünürəm ki, vençur fond kimi maliyyə alətlərinin bazara daxil olması bu sahəyə marağı daha da artıracaq. Bu da öz növbəsində əsasən yerli startapların maliyyələşmə cəhətdən fürsətlərinin artırılmasına səbəb olacaq”.
