Azərbaycan Mərkəzi Bankı (AMB), "Azərbaycan Banklar Assosiasiyası" İctimai Birliyi və Maliyyə Nazirliyinin nümayəndələrindən ibarət heyət Cənubi Koreyada işgüzar səfərdə olub.
Qırğız Milli Bankının nümayəndələri üçün AMB-də təcrübə mübadiləsi təşkil olunacaq
FED.az bu barədə AMB-yə istinadən xəbər verir.
Məlumata görə, Asiya İnkişaf Bankının dəstəyi ilə baş tutan bu səfər zamanı AMB-nin nümayəndələri Koreyanın kredit reytinqi agentliklərinin, “Kookmin Bank” və Maliyyə Xidmətləri Komissiyasının heyəti ilə görüşlərdə iştirak edib.
Koreya kredit reytinqi agentlikləri ilə görüşlər zamanı reytinq agentliklərinin institusional çərçivəsi, kredit reytinq sistemlərini dəstəkləyən metodologiyalar və təcrübələr, həmçinin müvafiq agentliklərin inkişafına hüquqi-tənzimləyici çərçivənin təsiri müzakirə olunub.
Ölkənin ən böyük banklarından olan “Kookmin Bank” nümayəndələri ilə görüş zamanı bankın risklərin qiymətləndirilməsi və mitiqasiyası təcrübələri öyrənilib. Səfər zamanı Koreyanın maliyyə sektorunun inkişafını və sabitliyini təmin edən Maliyyə Xidmətləri Komissiyası ("Financial Services Commision") ilə də görüş təşkil edilib. Görüşdə Koreyanın reytinq bazarının tənzimləmə çərçivəsi üzrə təcrübə mübadiləsi aparılıb.
AMB-nin “2024-2026-cı illərdə maliyyə sektorunun inkişaf Strategiyası”nda reytinq agentliklərinin fəaliyyətinin tənzimlənməsi ilə bağlı təşəbbüslər əksini tapıb. Hazırda reytinq agentlikləri üzrə hüquqi və requlyativ çərçivənin yaradılması diqqət mərkəzində saxlanılır və bu istiqamətdə tədbirlər icra edilir.
