"Azercell Telekom" MMC "ASAN İmza" xidmətinə 3 illik istifadədən sonra yenidən qoşulma üçün tələb olunan ödəniş məsələsinə yenidən baxa bilər".
Bunu "Azercell Telekom" MMC-nin prezidenti Vahid Mürsəliyev bildirib.
Onun sözlərinə görə, "ASAN İmza" dövlət layihəsi olduğundan bu məsələ yalnız "Azercell"in qərarına bağlı deyil: "Bunları nəzərə alaraq, əlaqədar qurumlarla 3 ildən sonra yenidən tələb olunan ödəniş məsələsini bir daha müzakirə edə bilərik. Əgər orada nə ilə isə bağlı hər hansı tələb yoxdursa, mütləq o məsələni nəzərə alacağıq və bu məsələ ilə bağlı nə edilməsi mümkündürsə, bunu mütləq edəcəyik".
Qeyd edək ki, 2015-ci ilin yanvarın 1-dən etibarən bütün "ASAN İmza" istifadəçi qrupları üzrə (vətəndaşlar - fiziki şəxslər, hüquqi şəxslərin nümayəndələri, dövlət qulluqçuları) xidmətə qoşulma haqqı 18 manat, aylıq abunə haqqı 1 manat, göndərilən 1 SMS-in qiyməti isə 0,03 manatdır. Xidmət haqqı 3 il müddət üçün nəzərdə tutulub. 3 ildən sonra xidməti yenidən aktiv etmək lazım olduqda yenidən bu məbləği ödəmək tələb olunur.
