İqtisadi İslahatların Təhlili və Kommunikasiya Mərkəzi (İİTKM) 2024-cü ilin yanvar-dekabr ayları üzrə “İxrac icmalı”nı təqdim edib.
FED.az xəbər verir ki, İcmala əsasən, 2024-cü ilin yanvar-dekabr ayları üzrə hazırlanmış qeyri-dövlət ixracatçı subyektlərin reytinqində ilk onluqda aşağıdakı şirkətlər təmsil olunublar:
“MKT İstehsalat Kommersiya” MMC, “Silk Vey Vest Aviaşirkəti” MMC, “ASG Business Aviation” MMC, “Baku Steel Company” QSC, Süleymanova Göhər Süleyman qızı, “Azərbaycan İnterneyşnl Mayninq Kompani Limited Şirkəti”nin Azərbaycan Respublikasındakı nümayəndəliyi, “Azərbaycan Şəkər İstehsalat Birliyi” MMC, "Tabaterra" QSC, “Khan-El” MMC, “Atena” Məhdud Məsuliyyətli Cəmiyyəti.
“MKT İstehsalat Kommersiya” MMC 2024-cü il ərzində 93,8 milyon manat gəlir əldə edib. Bu 2023-cü ilə nisbətən 5,1 milyon manat (6%) artıb.
“Silk Vey Vest Aviaşirkəti” MMC-nin ixracdan gəlirləri 75,7 milyon manat olub. 2023-cü ildə isə bu göstərici 776 min manat idi. Bu da illik müqayisədə 74,9 milyon manat (97,6 dəfə) artım deməkdir.
“Baku Steel Company” QSC-nin gəlirləri son bir il ərzində 2 milyon manat (3,2%) artaraq 65 milyon manata yüksəlib, “Azərbaycan İnterneyşnl Mayninq Kompani Limited Şirkəti”nin Azərbaycan Respublikasındakı nümayəndəliyinin gəlirləri isə 19,6 milyon manat (33,1%) azalaraq 39,6 milyon manata düşüb.
“Azərbaycan Şəkər İstehsalat Birliyi”nin qazancı 15 milyon manat (63,6%) artaraq 38,6 milyon manata yüksəlib.
"Tabaterra" QSC 2024-cü ildə 34,6 milyon manat gəlir götürüb ki, bu da 2023-cü illə müqayisədə 26,9 milyon manat (4,5 dəfə) çoxdur.
“Khan-El” MMC-nin ixracdan gəlirləri 6 milyon (25%) artaraq 30 milyon manata, “Atena” MMC-nin gəlirləri isə 22,6 milyon manat (5 dəfə) artaraq 28,2 milyon manata çatıb.
