Dövlət Gömrük Komitəsi xaricdən gətirilən avtomobillərin və mobil telefonların gömrük ödənişinin artırıldığı haqda məlumatlara münasibət bildirib.
FED.az biznes və maliyyə xəbərləri portalı Qafqazinfo-ya istinadən xəbər verir ki, bu barədə DGK açıqlama yayıb:
“Bəzi sosial şəbəkə istifadəçiləri xaricdən gətirilən avtomobillərin və mobil telefonların qeydiyyatı zamanı tələb olunan dövlət rüsumunun artımını gömrük ödənişlərinin artırılması kimi qələmə verir.
Dövlət Gömrük Komitəsi bildirir ki, gömrük ödənişlərində hər hansı artım yoxdur və qeyd olunan məsələ gömrük orqanlarının fəaliyyət sahəsinə aid deyil”.
Xatırladaq ki, bir neçə gün öncə "Dövlət rüsumu haqqında" qanuna dəyişiklik ediləcəyi ilə bağlı məlumat yayılmışdı. Bildirilirdi ki, dəyişikliyə əsasən, Azərbaycana gətirilən avtomobillərin və telefonların qeydiyyatı ilə bağlı tutulan dövlət rüsumunun məbləği artırılacaq.
