Rusiya Kənd Təsərrüfatı Bankının məlumatına görə, ölkədə rəflərdə olan bütün məhsulların 58%-ni təşkil edən idxal təchizatı ilə bağlı problemlərə görə, Rusiya pərakəndə satış şirkətləri meyvə qıtlığı ilə üzləşib.
FED.az “Vedomosti”yə istinadən xəbər verir ki, portağal, üzüm, bibər, nar və digər tərəvəz və meyvələrin olduğu yüzlərlə konteyner limanlarda ilişib qalıb və "Rospotrebnadzor"un (İstehlakçıların Hüquqlarının Müdafiəsi və İnsan Rifahına Nəzarət Federal Xidməti) yoxlamasını gözləyir.
Dörd pərakəndə satış şəbəkəsinin nümayəndələri bildiriblər ki, malların rəsmiləşdirilməsində gecikmələr bir həftədən üç həftəyə qədər davam edir, buna görə mallar xarab olur və bəzi mövqelər üçün artıq çatışmazlıq yaranır.
"Səbəb "Rospotrebnadzor"un kənd təsərrüfatı məhsullarının idxalına nəzarətini gücləndirməsidir, buna görə də gömrükdə karantin və yoxlama müddəti artıb", - "Krasnıy Yar Group"un (Красный Яр) kommersiya direktoru qeyd edir.
“Vedomosti”yə federal məmur bildirib ki, hakimiyyət artıq problemdən xəbərdardır. "Vernıy" ("Верный") şəbəkəsinin nümayəndəsinin sözlərinə görə, gecikmələr əsasən portağal, limon, qreypfrut və türk naringilərinə aiddir.
Bütövlükdə bazarda bu meyvələrin qıtlığının olduğunu və bunun fonunda tədarükçülərin alış qiymətlərini 3 dəfə artırdığını deyir.
Xüsusilə Türkiyədən gələn məhsullara xüsusi nəzarət tətbiq edilib. 88 istehsalçının meyvə-tərəvəz tədarükü dayandırılıb. "Rospotrebnadzor" bildirib ki, o, tərkibində “bəyan edilməmiş kimyəvi maddələr” ola bilən təhlükəli məhsulların dövriyyəsinə nəzarət edir.
Federal Gömrük Xidmətinin məlumatına görə, son bir ildə Rusiya əsasən qeyri-MDB ölkələrindən 33,9 milyard dollar dəyərində ərzaq idxal edib. (Marja)
