Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair strateji yol xəritəsində nəzərdə tutulmuş ölkədə lizinq və alternativ maliyyə alətləri (forvard, fyuçers, opsion, svop, faktorinq və s.) bazarının inkişaf etdirilməsi ilə kiçik və orta sahibkarlıq (KOS) subyektlərinin maliyyəyə çıxışının asanlaşdırılması prioriteti çərçivəsində 2017-ci il üçün nəzərdə tutulmuş tədbirlərin icrası istiqamətində cari ilin ilk yarısında iş aparılmayıb.
FED.az xəbər verir ki, APA-nın məlumatına görə, bu barədə strateji yol xəritəsinin yanvar-iyun ayları ərzində icra vəziyyətinə dair monitorinq və qiymətləndirmə hesabatında qeyd edilib.
Planlaşdırılmış tədbirlər arasında "Lizinq haqqında" qanun layihəsinin hazırlanmasıdır. Burada əsas icraçı qurum Maliyyə Bazarlarına Nəzarət Palatası (MBNP), digər icraçı qurumlar isə Ədliyyə və İqtisadiyyat nazirlikləridir. Sənəddə qeyd edilib ki, icra müddəti 2017-ci il olan tədbirin icrasına hələ başlanılmayıb. Əlaqələndirici qurumdan verilən məlumatda qeyd edilib ki, lizinq fəaliyyətinin genişləndirilməsi istiqamətində MBNP tərəfindən beynəlxalq təcrübənin araşdırılmasına başlanılıb. Bununla yanaşı, statistik bazanın və qanunvericilik çərçivəsinin təkmilləşdirilməsi məqsədilə Beynəlxalq Maliyyə Korporasiyası (IFC) və Dünya Bankı ilə əməkdaşlıq üçün müraciət olunub və texniki dəstəyin göstərilməsi ilə bağlı ilkin nəticələr əldə edilib.
Planlaşdırılan digər tədbir isə lizinq fəaliyyətinin tənzimlənməsi və güzəştlərin tətbiqidir. Tədbirin icra müddəti 2017-2018-ci illərdir. Bu tədbirin də icrasına başlanılmayıb. Burada əsas icraçı qurum MBNP, digər icraçı qurumlar isə İqtisadiyyat və Vergilər nazirlikləridir.
Sonuncu planlaşdırılan tədbir isə KOS subyektlərinin maliyyələşdirilməsində alternativ maliyyə alətlərindən (forvard, fyuçers, opsion, svop, faktorinq və s.) istifadənin genişləndirilməsidir. Burada əsas icraçı qurum MBNP, digər icraçı qurumlar isə Mərkəzi Bank və İqtisadiyyat Nazirliyidir. İcra müddəti 2017-2020-ci illər olan bu tədbirin də icrasına başlanılmayıb. Əlaqələndirici qurumdan verilən məlumata görə, hesabat dövründə yerli bazarda törəmə qiymətli kağızların ticarətinin təşkil edilməsi və beynəlxalq təcrübənin öyrənilməsi ilə bağlı işlərə başlanılıb. Bu istiqamətdə törəmə maliyyə alətləri bazarının tənzimlənməsi və nəzarəti, tənzimlənən bazarda törəmə maliyyə alətlərinin ticarətə buraxılması və tədavülü, bu alətlər üzrə öhdəliklərin müəyyən edilməsi və icrası, hesabatlığı, həmçinin müxtəlif baza aktivlərinə əsaslanan fyuçers, opsion və svop müqavilələrinin formada fond birjasında təşkili üzrə beynəlxalq təcrübənin öyrənilməsinə başlanılıb.
