Son on ildə regionlarda ümumi gücü 2000 MVt-a yaxın 17 elektrik stansiyası tikilib, 10 min km-dən çox elektrik verilişi xətləri və 1500-dən artıq yarımstansiya tikilib, yaxud yenidən qurulub.
Bu barədə Azərbaycan energetika naziri Natiq əliyevin “Energetiklər günü” münasibəti ilə rəsmi mətbuatda çıxan məqaləsində qeyd edilir.
Nazirin sözlərinə görə, 2005-ci ilə qədər elektrik enerjisinin itkisi daha yüksək olub: “Azərbaycanın Enerji Sisteminin qoyuluş gücü 5160,7 MVt olmuşdu ki, bu da ölkənin elektrik enerjisinə olan tələbatını ödəməməklə yanaşı, elektrik enerjisinin idxalı məcburiyyətini yaradırdı. Elektrik enerjisi sistemində baş verən nasazlıqlar səbəbindən illik satışın 7%-i itirilirdi. Qənaətcil elektrik stansiyalarının tikilib istifadəyə verilməsi, fiziki cəhətdən köhnəlmiş enerji bloklarının yenidən qurulması və stansiyaların istismar rejimlərinin yaxşılaşdırılması, habelə enerji istehsalında 97,8% təbii qaz yanacağından istifadə nəticəsində son 10 ildə hər kilovatsaat elektrik enerjisinin istehsalına yanacaq sərfi 413 qr/kVt.saatdan 2012-ci ildə 314,2 qrama qədər azalıb”.
N.Əliyev məqaləsində “Azərenerji” ASC-nin Azərbaycan Dövlət Neft Şirkətinə (SOCAR) olan borcları ilə bağlı məsələlərə toxunub: “Energetika Nazirliyi tərəfindən “Azərenerji”-nin maliyyə-təsərrüfat fəaliyyəti, o cümlədən SOCAR-dan alınan təbii qaza görə ödənişlərin tam aparılması, energetikanın inkişafına investisiya qoyuluşu, paylayıcı elektrik şəbəkələrində əsaslı yenidənqurma işlərinin aparılması və maliyyələşdirmə məsələləri araşdırılaraq təhlil edilib. Beləliklə, energetika sektorunda uğurla həyata keçirilən tədbirlər nəticəsində ölkənin elektroenergetika sisteminin generasiya gücü 2015-ci ildə 7149 MVt-a çatdırılıb, 24,7 mlrd.kVts elektrik enerjisi istehsal olunub ki, bunun da 93,4%-i İES-in, 6,6%-i SES-in payına düşür. Elektrik enerjisinin ixracı isə 265 mln. kv saat təşkil edib”.
