KOBİA-nın Müşahidə Şurasının növbəti iclasında Agentliyin 2022-ci il və 2023-cü ilin birinci yarımilliyi üzrə hesabatı təqdim edilib, 2024-cü il üzrə planlar və digər cari məsələlər müzakirə olunub.
46-cı KOB dostu ofisi - FƏALİYYƏTƏ BAŞLADI
FED.az xəbər verir ki, Kiçik və Orta Biznesin İnkişafı Agentliyinin (KOBİA) Müşahidə Şurasının növbəti iclası keçirilib.
Müşahidə Şurasının sədri, iqtisadiyyat naziri Mikayıl Cabbarovun sədrliyi ilə keçirilən iclasda KOBİA-nın 2022-ci il və 2023-cü ilin birinci yarımilliyində fəaliyyəti üzrə görülmüş işlərə dair məlumat verilib, 2024-cü il üçün qarşıya qoyulmuş prioritet inkişaf istiqamətləri, KOB-ların inkişafına və dəstəklənməsinə yönəlmiş tədbirlər və gündəlikdə duran digər məsələlər müzakirə edilib.
KOBİA-nın İdarə Heyətinin sədri Orxan Məmmədov müvafiq dövr ərzində Agentliyin fəaliyyətinə dair təqdimatla çıxış edərək, KOB-ların inkişafı, bilik və bacarıqlarının artırılması, maliyyə resurslarına və satış bazarlarına çıxışının genişləndirilməsi, KOB maraqlarının müdafiəsi istiqamətində görülmüş işlər barədə məlumat verib. Qeyd edilib ki, hesabat dövründə 22 KOB inkişaf mərkəzi tərəfindən 12 minə yaxın KOB subyektinin və biznesə başlamaq istəyən şəxsin faydalandığı 1000-dən çox təlim keçirilib, 2200-dən çox KOB-a məsləhət xidməti göstərilib, 500-dən çox biznes plan hazırlanıb. Mikro və kiçik sahibkarlar üçün innovativ fəaliyyət üzrə vergi güzəştlərini nəzərdə tutan 51 “Startap” şəhadətnaməsinin verilməsi ilə bu sənədi alan KOB-ların sayı 105-ə çatıb. 40 KOB-un təhsil, elm, tədqiqat və dəstək istiqamətləri üzrə layihələrinə 747 min manat qrant ayrılıb. Sahibkarların müraciəti və KOBİA-nın təşəbbüsü ilə 18 daxili bazar araşdırması aparılıb. 23 sərgidə 1133 KOB subyektinin iştirakına dəstək göstərilib. Hesabat dövründə ticarət şəbəkələrinə çıxışa dəstək mexanizmindən 25 KOB subyekti yararlanıb. KOB-lara yerində dəstək və xidmətləri təmin edən 20 KOB dostu ofisinin fəaliyyətə başlaması ilə mövcud ofislərin sayı 46-ya çatıb. 2023-cü ildə sahibkarlara vahid məkanda dövlət və özəl qurumlar tərəfindən xidmətlərin göstərildiyi “Bakı KOB evi”nin sahibkarların istifadəsinə verilməsi ilə KOB evlərinin sayı 3 olub. İldən-ilə KOB evlərinin xidmətlərindən istifadə edən sahibkarların sayında müsbət artım dinamikası müşahidə edilməkdədir. KOB evləri tərəfindən sahibkarlara 2022-ci ildə 73 mindən çox, 2023-cü ilin I yarısında isə 197 mindən çox xidmət göstərilib. Hesabat dövründə 3300-dən çox KOB-un iştirakı ilə 14 sorğu keçirilib. Cari ildən tətbiqinə başlanan KOB klaster mexanizmi üzrə 6 KOB-dan müraciət daxil olub və bu istiqamətdə müvafiq işlər görülməkdədir.
İclasda qeyd olunan istiqamətlər və digər məsələlərlə bağlı Müşahidə Şurası üzvlərinin fikirləri dinlənilib, müzakirələr aparılıb, müvafiq qərarlar qəbul edilib.
İclas çərçivəsində iqtisadiyyat naziri Mikayıl Cabbarov və Müşahidə Şurasının üzvləri “Bakı KOB evi”nin fəaliyyəti ilə tanış olub, KOBİA-nın kollektivi ilə görüşüblər.
