Bugün iqtisadiyyat sahəsində ən nüfuzlu mükafat sayılan Nobel mükafatı sahibinin adı açıqlanacaq. 1968-ci ildə dünyanın ən qədim mərkəzi bankı olan İsveç Bankı tərəfindən təsis olunan bu mükafatın sayca 79-cu sahibinin kim olacağı maraqla gözlənilir. Mükafatı təqdim edən İsveç Kral Elmlər Akademiyası isə namizədlərin adını həmişəki kimi gizli saxlayır. Bu adlar yalnız 50 ildən sonra bəlli olacaq.
FED.az The Wall Street Journal-a istinadən bildirir ki, neyroiqtisadiyyat sahəsindəki araşdırmalarına görə Kolin Kamerer (Kaliforniya İnstitutu) və Corc Louenşteyn (Karnegi-Mellon Universiteti), işçilərin məhsuldarlığının təhlili, işsizlik və resessiya sahəsindəki araşdırmalarına görə Robert Holl (Stenford Universiteti), korporativ maliyyə sahəsindəki qərarların təhlilinə görə Maykl Censen (Harvard Universiteti) və Stüart Mayers (Massaçüsets Texnoloji İnstitutu), pul siyasəti sahəsindəki araşdırmalarına görə Con Teylor (Stenford Universiteti) kimi alimlərin adları ehtimal olunan builki namizədlər sırasında hallanır. Həmçinin, iqtisadi artım problemləri üzrə araşdırmalar aparmış Pol Romer (Nyu-York Universiteti), dövlət maliyyə siyasəti sahəsində elmi araşdırmalar müəllifi Martin Feldşteyn (Harvard Universiteti), iqlim dəyişikliklərinin iqtisadi təsirlərini öyrənən Uilyam Nordhaus (Yel Universiteti), iqtisadi məhsuldarlıq məsələlərini araşdıran Deyl Yorgerson (Harvard Universiteti), davranış iqtisadiyyatını öyrənən Riçard Tayler (Çikaqo Universiteti) də potensial mükafatçılar sırasındadır.
Xatırladaq ki, ötən il iqtisadiyyat sahəsində Nobel mükafatı müqavilələr nəzəriyyəsi üzərində çalışan Oliver Hart (Harvard Universiteti) və Benqt Holmstremə (Massaçüsets Texnoloji İnstitutu) təqdim olunub. 2016-cı illə müqayisədə builki Nobel mükafatının maddi hissəsi artırılaraq 9 milyon isveç kronuna (1,12 milyon dollara) çatdırılıb.
Bugünədək ali mükafatın sahibi olmuş iqtisadçılar arasında ABŞ və Böyük Britaniya alimləri üstünlük təşkil edir. 78 “Nobelçi” alimdən 53-ü Birləşmiş Ştatların, 10-u isə Britaniyanın vətəndaşlarıdır.
İqtisadiyyat üzrə Nobel mükafatını kim alacaq?
11:03
9 Okt 2017
