İqtisadiyyat nazirinin birinci müavini Elnur Əliyevin başçılıq etdiyi nümayəndə heyəti İspaniya Krallığının Madrid şəhərinə səfər edib.

FED.az xəbər verir ki, nazirliyin yaydığı məlumatda bildirilir ki, səfər çərçivəsində İspaniyanın Sənaye, Turizm və Ticarət Nazirliyinin Xarici Ticarət üzrə Dövlət Katibi xanım Şiana Margarida Mendes Bertolo ilə görüş keçirilib.

Ölkələrimiz arasında iqtisadi-ticarət əlaqələrinin potensialı barədə məlumat verən Elnur Əliyev bu imkanların reallaşdırılmasında biznes dairələrinin iştirakı ilə işgüzar görüşlərin təşkilinin əhəmiyyətini qeyd edib, Azərbaycanda yaradılmış əlverişli biznes və investisiya mühiti, işğaldan azad edilmiş ərazilərimizdə reinteqrasiya və biznesin dirçəldilməsi məqsədilə görülən işlər, investorlara yaradılan imkanlar barədə ətraflı məlumat verib.

İki ölkə arasında qarşılıqlı investisiyaların artırılması, bu istiqamətdə hüquqi tənzimləmənin təmin edilməsi baxımından “Azərbaycan Respublikası Hökuməti ilə İspaniya Hökuməti arasında sərmayələrin təşviqi və qarşılıqlı qorunması haqqında saziş”in  hazırlanmasının önəmi vurğulanıb.

Xanım Şiana Margarida Mendes Bertolo ölkələrimizin qarşılıqlı faydalı əməkdaşlığını qeyd edib, tərəfdaşlığın genişləndirilməsi istiqamətləri barədə fikirlərini bölüşüb.

Tərəflər iqtisadi əlaqələrin mövcud vəziyyəti, əməkdaşlığın inkişafı perspektivləri barədə müzakirələr aparıblar.

İspaniya Ticarət Palatasında görüş keçirilib

İspaniyada səfərdə olan Azərbaycan nümayəndə heyəti ilə İspaniya Ticarət Palatasında bu ölkədə fəaliyyət göstərən sahibkarların görüşü keçirilib.

Görüşdə iqtisadiyyat nazirinin birinci müavini Elnur Əliyev işğaldan azad olunmuş ərazilərimizdə və sənaye parklarında yaradılan investisiya imkanları barədə məlumat verib. "Yaşıl" enerji, kənd təsərrüfatı, turizm, su idarəçiliyi kimi sahələrdə Azərbaycanın İspaniya təcrübəsindən yararlana biləcəyi və bu istiqamətlərdə əməkdaşlığın yüksək potensiala malik olduğu diqqətə çatdırılıb. 

İspaniya sahibkarları azərbaycanlı həmkarları ilə əməkdaşlığın genişləndirilməsində maraqlı olduqlarını qeyd ediblər.

Görüşdə Azərbaycanın biznes imkanlarına dair təqdimat nümayiş olunub.