“Karantin məhdudiyyətləri zamanı istehlakçılar onlayn mağazalardan aktiv şəkildə geyimlər almağa başlayandan sonra yerli idxalçılar ciddi satış problemi ilə üzləşiblər”.
Eləcə də bax: Türkiyə istehsalı geyimlər 70% bahalaşacaq
FED.az xəbər verir ki, bunu Azərbaycan Pərakəndə Geyim İdxalçıları Assosiasiyasının sədri Fərid Novruzi bildirib.
Onun rəsmi mənbələrə istinadən verdiyi məlumata görə, karantin dövründə azərbaycanlı istehlakçılar xarici onlayn mağazalarda təxminən 165 milyon manat xərcləyiblər və əsasən geyimləri Türkiyə tədarükçülərindən alıblar (Türkiyə mənbələrinə görə bu məbləğ iki dəfə çoxdur):
“Bu, böyük məbləğdir, əlverişli şəraitdə bu pullar ölkədə qala bilərdi. Biz bir assosiasiya olaraq, hətta geyim istehlakçıları kimi başa düşürük ki, hər bir vətəndaşın seçim hüququ var və imkan daxilində qənaət etmək istəyir. Amma biz mağazalarımızda qiymətlərin yüksək olması problemini də tanıyırıq və həll etmək istəyirik. Brend mağazalarda malların qiyməti istehsalçının tövsiyə etdiyi qiymətlərlə müqayisədə 20%-30%-dən çox olmamalıdır. Təəssüf ki, bu gün bu fərq 40%-ə çatır və bəzən Türkiyədən gələn geyimlər üzrə daha da yüksək olur”.
Assosiasiyanın sədrinin sözlərinə görə, xarici onlayn platformalardan mal idxalına güzəştli şərait yaradılmasaydı, yaranmış vəziyyətin bəlkə də öhdəsindən gələ bilərdilər:
"Hazırda şəxsi istifadə üçün mal idxal edən şəxslər üçün müəyyən edilmiş 300 dollarlıq limitdən sui-istifadə edilir. Xüsusilə qeyd etmək istəyirəm ki, biz şəxsi istifadə üçün qoyulmuş məhdudiyyətlərin əleyhinə deyilik, lakin bu imtiyazdan iş adamları tərəfindən fəal şəkildə istifadə edildikdə, onlar vergi ödəməkdən yayınırlar ki, bu da haqsız rəqabətə gətirib çıxarır və onlara oxşar məhsulu ucuz qiymətə satmağa şərait yaradır. Sonra biz bazarda ayaqda qalmaq üçün mövcud vəziyyətdən danışmağa və ondan çıxış yollarını axtarmağa məcbur oluruq".
Fərid Novruzi qeyd edib ki, idxalçıların rəqabətdə uduzmamaları və işçilərini ixtisar etməmələri üçün idxal olunan geyimlərə tətbiq edilən gömrük rüsumunun ləğvinə ehtiyac var:
“O cümlədən bir sıra mal qrupları üzrə, əsasən də uşaq geyimləri üzrə ƏDV-nin azaldılmasını təklif edirik. Buna nail olsaq, istehlakçının onlayn mağazaların xidmətlərinə müraciət etməsinə ehtiyac qalmayacaq, çünki rəqabətli qiymətlərlə həm yerli mağazalarda, həm də yerli onlayn platformalarda mal almaq mümkün olacaq. Əks halda, belə bir vəziyyətdə rəqabət aparmaq bizim üçün çətin olacaq. İndidən bir çox yerli şirkətlər mağazaların sayını, müvafiq olaraq işçilərin sayını azaldırlar. Hətta biznesin bağlanmasını da istisna etmirlər”.
Fərid Novruzi əlavə edib ki, digər bir problem ucuz məhsula brend görkəmi verib, saxta loqo yapışdırıb orijinal kimi satışa təqdim edilməsidir. Hazırda Azərbaycanda saxta mal probleminin miqyası dəhşətlidir. (Marja)
