Asiya İnkişaf Bankı 2018-ci ildə Azərbaycan ÜDM-in artım proqnozunu 1,7% səviyyəsində saxlayıb. FED.az xəbər verir ki, bu barədə yenilənmiş "Asian Development Outlook 2018" icmalında qeyd edilir.

Bankın qiymətləndirmələrinə əsasən, 2019-cu ildə Azərbaycanda ÜDM-in artım proqnozu 2% səviyyəsində saxlanılıb.

“2018-ci ilin birinci yarısında iqtisadi artım bir il öncə 1,3% azalmaya qarşı 1,3% təşkil edib. Cari ilin yanvar-iyun aylarında neft sektorunda artım 0,1%, qeyri-neft sektorunda - 2% təşkil edib”, - icmalda qeyd olunur.

Birinci yarımillikdə sənaye istehsalında artım 1,2%, ASK sahəsində - 7,6%, xidmətlər sahəsində - 3,1% təşkil edib.

Proqnozlara görə, 2018-ci ildə Azərbaycanda inflyasiya 4,5%-dək azalacaq (aprel proqnozu - 7% olub), lakin 2019-cu ildə 5%-dək sürətlənəcək (aprel proqnozu - 8%). Bankın qiymətləndirmələrinə əsasən, 2018-ci ilin dördüncü rübündə kommunal xidmətlərin tariflərinin artması az ehtimal olunur. Bu səbəbdən bank 2018-2019-cu illər üzrə inflyasiya proqnozlarını azaldıb.

Bankın proqnozlarına əsasən, 2018-ci ilin yekunları üzrə Azərbaycanın tədiyə balansının profisiti ÜDM-in 7,9% (aprel proqnozu - ÜDM-in 6,9%-i), 2019-cu ildə - ÜDM-in 10,9% təşkil edəcək (aprel proqnozu - ÜDM-in 6,2%-i).

“2018-ci ilin birinci yarısında xarici ticarətdə Azərbaycanın müsbət saldosu 4,3 mlrd.dollar təşkil edib. Hesabat dövründə ixrac 34,7% artıb, bu da qismən neftin yüksək qiyməti ilə əlaqədardır. Eyni zamanda, qeyri-neft məhsullarının ixracı 20,1% artıb. Neftin qiymətinin yüksək səviyyədə qalması 2018-2019-cu illərdə Azərbaycanın tədiyə balansının profisitinə müsbət təsir edəcək”, - bank vurğulayır.