2007-ci ildən etibarən ABŞ-ın 161 şirkəti Türkiyə bazarına daxil olub. "Ernst & Young" (E&Y) şirkətinin məlumata görə, 161 ABŞ şirkəti Türkiyədə fəaliyyət göstərən şirkətlərdə aldığı səhmlər üçün 6,675 mlrd. dollar məbləğində investisiya yatırıb.
Bağlanan əqdlər arasında ən irisi "Goldman Sachs" investisiya bankının payına düşüb. Belə ki, adıçəkilən bank 2015-ci ildə "SOCAR Turkey Energy" şirkətinin səhmdarı olmaq üçün 1,3 mlrd. dollar xərcləyib.
Hesabat dövründə İspaniya şirkətləri türk iş adamları ilə ümumi dəyəri 9,683 mlrd. dollar olan 23 əqd bağlayıb. Bağlanan ən iri əqd BBVA-nın payına düşür. Belə ki, 2010 ildə BBVA 5,838 mlrd. dollarından keçərək "Garanti Bankası"nın ən iri səhmdarı olub. 2014 və 2017-ci illərdə tam olaraq "Garanti Bankası" üzərində nəzarəti ələ keçirən BBVA investisiya qoyuluşunu 9,218 mlrd. dollara çatdırıb.
Xatırladaq ki, "Goldman Sachs" 2015-ci ildə "SOCAR Turkey Energy A.Ş." şirkətinin (SOCAR-ın Türkiyədəki törəməsi) səhmlərinin 13%-nə yiyələnmək üçün 1,3 mlrd. dollar ödəyib. SOCAR əldə edilən vəsaitin 1 mlrd. dollarlıq hissəsini "Petkim Petrokimya Holding A.Ş."-nin özəlləşdirilməsi nəticəsində yaranmış öhdəliyin yerinə yetirilməsinə yönəldib.
