“Cənab prezidentin ölkə iqtisadiyyatının inkişafı ilə qəbul edilmiş qərarlarında yerli istehsalın inkişaf etdirilməsi və təşviq olunması xüsusi yer tutur”.
FED.az xəbər verir ki, bunu iqtisadiyyat nazirinin müavini Niyazi Səfərov jurnalistlərə açıqlamasında deyib.
Onun sözlərinə görə, hazırda ölkədə ciddi islahatlar həyata keçirir, təşviq və dəstək mexanizmi tətbiq olunur: "Dövlət satınalmaları haqqında qanunvericilikdə 20 faiz güzəşt barədə müvafiq müddəa var. Eyni zamanda büdcə təşkilatları tərəfindən satınalmalar həyata keçirilərkən yerli məhsullara üstünlük verilməsi ilə bağlı cənab prezidentin qərarı da var idi və bu istiqamətdə real addımlar atılır. Yerli məhsulların çeşidinin və keyfiyyətinin artması da sahibkarların dövlət satınalmalarında onları daha geniş təqdim etməsi üçün əlverişli şərait yaradır".
Eləcə də bax: “Prezident soruşdu ki, bəs, 5000 dollar necə olacaq?”
Nazir müavininin sözlərinə görə, ölkə başçısının siyasəti iqtisadiyyatın davamlı inkişafına yönəlib: “Davamlı inkişaf da sahibkarlığın inkişafı və dəstəklənməsi ilə bağlıdır. Dövlət satınalmaları təkcə formal olaraq müvafiq qurumlar tərəfindən xidmətlərin, məhsulların və işlərin alınması ilə bağlı deyil. Bu, həm iqtisadi baxımdan, həm sahibkarlığın inkişafı baxımından, həm də rəqabətliliyin təmin olunması baxımından daha dərindir".
