Dünya İqtisadi Forumunun (DİF, WEF) təşkil etdiyi Davos Zirvəsi, gələn həftə İsveçrənin Davos qəsəbəsində başlayacaq. FED.az xəbər verir ki, 22-25 Yanvarda keçiriləcək sammitə dair DİF-in Cenevrədə yerləşən mərkəzində mətbuat konfransı keçirilib.
Dünya İqtisadi Forumundan (DİF) verilən məlumata görə, bu il sammit 49-cu dəfə keçiriləcək.
Müvəqqəti büdcə böhranına görə federal hökumətin bağlanmasını əsas göstərərək Davos Sammitinə qatılmayacağını açıqlayan ABŞ Prezidenti Donald Tramp ilə bərabər, Böyük Britaniyanın Baş naziri Theresa May və Fransa Prezidenti Emmanuel Macron da sammitdə iştirak etməyəcək.
60-dan artıq ölkənin dövlət başçısı və baş nazir səviyyəsində təmsil ediləcəyi sammitdə, Almaniyanın Baş naziri Angela Merkel, Yaponiyanın Baş naziri Şinzo Abe və digər nüfuzlu şəxslər də iştirak edəcəklər.
Davos Sammitində 110 ölkədən 3 mindən çox iş adamı, siyasətçi, alim və qeyri-hökumət təşkilatı nümayəndəsi iştirak edəcək.
"Qloballaşma: Dördüncü Sənaye İnqilabı Dövründə Qlobal Quruluşu Formalaşdırmaq" əsas mövzusu ilə keçiriləcək sammitdə, 350-yə yaxın sessiya keçiriləcək.
Dünya İqtisadi Forumunun Təsisçisi və icraçı direktoru Klaus Şvab, sammitə dair verdiyi açıqlamada "Bizim üçün gənc nəslin sammitdə iştirakı xüsusilə çox mühümdür. Qlobal əhalinin yarısı 27 yaşdan aşağıdır. Onların fikirlərinə yer vermək məcburiyyətindəyik",- deyib.
Şvab, sammitə qatılacaq 3 mindən çox iştirakçının yarısının, iş dünyası liderlərindən ibarət olacağını qeyd edib.
