Azərbaycan və Böyük Britaniya arasında iqtisadi əlaqələrinin strateji tərəfdaşlıq istiqamətində inkişafı, qarşılıqlı investisiyaların təşviqi və qeyri-neft-qaz sektorunda əməkdaşlığın genişləndirilməsi imkanları müzakirə olunub.
FED.az xəbər verir ki, bunu iqtisadiyyat naziri Mikayıl Cabbarov "X" sosial şəbəkəsindəki hesabında bildirib.
Məlumata görə, müzakirələr Birləşmiş Krallığa işgüzar səfər çərçivəsində bu ölkənin Baş nazirinin biznes və investisiyalar üzrə xüsusi müşaviri Varun Çandra ilə görüşdə baş tutub.
Eyni zamanda görüşdə sənaye, enerji, ticarət, maliyyə xidmətləri və investisiya sahələrində birgə təşəbbüslərin perspektivləri, Britaniya şirkətlərinin və institusional investorların Azərbaycandakı layihələrə cəlb olunması imkanları barədə fikir mübadiləsi aparılıb. Ölkələrin işgüzar dairələri arasında birbaşa əlaqələrin gücləndirilməsinin, yeni investisiya layihələrinin həyata keçirilməsində Britaniyanın təcrübə, texnologiya və maliyyə imkanlarından istifadənin əhəmiyyəti vurğulanıb.
London Fond Birjasının (“London Stock Exchange”) baş icraçı direktoru Deym Hoget ilə görüşdə kapital bazarları sahəsində əməkdaşlıq, Azərbaycan şirkətlərinin beynəlxalq maliyyə resurslarına çıxışının genişləndirilməsi və kapital bazarları arasında əlaqələrin inkişafı perspektivləri müzakirə edilib.
Səfər çərçivəsində “Hinduja Group”, “Gulf Oil International Limited”, “Air Asia” və “JPMorgan Chase” şirkətlərinin nümayəndələri ilə də görüşlər keçirilib. Görüşlərdə investisiya, enerji, sənaye və aviasiya sahələrində əməkdaşlıq, ticarətin və infrastruktur layihələrinin maliyyələşdirilməsi, Azərbaycan şirkətlərinin beynəlxalq maliyyə resurslarına çıxışının genişləndirilməsi imkanları müzakirə olunub.














