"Rusiyada Azərbaycan şərabına tələbat artmağa, ixrac sifarişləri aktivləşməyə başlayıb".
FED.az xəbər verir ki, bunu "Azərbaycan Şərab İstehsalçıları və İxracatçıları Assosiasiyası" İctimai Birliyinin sədri Elçin Mədətov deyib.
Eləcə də bax: Azərbaycan şərabının 80%-i Rusiyaya ixrac olunur - MÜSAHİBƏ
"Fevralın sonundan başlayaraq sifarişlərində durğunluq yaranmışdı. Bu aydan isə sifarişlərdə aktivlik hiss olunur. Dondurulmuş sifarişlər belə aktivləşib. Hətta indiyə qədər Azərbaycanla işləməyən Rusiya şirkətləri bizimlə əməkdaşlığa maraq göstərirlər”, - deyə o, qeyd edib.
Assosiasiya rəhbərinin sözlərinə görə, hazırda Avropanın, eləcə də qonşu Gürcüstanın şərab istehsalçları məhsullarını Rusiyaya göndərə bilmirlər: "Bu isə bizə imkan verir ki, Rusiyaya ixracı genişləndirək. Hazırda qonşu ölkənin bir neçə ticarət şəbəkəsi ilə danışıqlar gedir. Rusiya tərəfi Azərbaycanla ortaq layihələr həyata keçirmək istəyir. Azərbaycan əmtəə nişanı adı altında hər hansı məhsulu süzüb, Rusiya bazarına aparmaq istəyirlər. Ümid edək ki, bu səylər müsbət nəticələnər”.
E.Mədətov Azərbaycan şərablarının Avropaya ixrac imkanlarına da münasibət bildirib: "Avropa ölkələrindən yalnız Polşa, Belçika və Ruminiyaya məhsul göndərə bilirik. Çünki Avropa bazarı çox konservativdir və buraya ixracı genişləndirmək bir qədər çətindir. Odur ki, məhsullarımızın 80 %-i Rusiya bazarına göndərilir".
2021-ci ildə Azərbaycan cəmi 4 milyon ABŞ dolları dəyərində 3 milyon şüşə şərab ixrac edib. Bu, ölkədə istehsal olunmuş şərabın 20-30%-i deməkdir. Qalan məhsul - təxminən 11 milyon şüşə şərab ölkə daxilində satılıb. (Report)
