Azərbaycanda daha bir şəhərdə sosial evlərin tikintisi başlayacaq.
FED.az xəbər verir ki, Mənzil İnşaatı Dövlət Agentliyinin (MİDA) nəzdindəki, eyni adlı «MİDA» MMC Yevlax şəhərində sosial evərin tikintisinə hazırlıqla bağlı tenderə yekun vurub.
Tender Yevlax şəhəri, Rəşid Budaqov küçəsi, 1 ünvanında 1,9 ha torpaq sahəsində çoxmənzilli yaşayış binaların tikintisi ilə əlaqədar şəhərsalma əsaslandırılması, tikinti layihəsinin hazırlanması və müəllif nəzarətinin aparılması işlərinin satın alınması üzrə elan edilmişdi.
Martın əvvəlində elan edilimiş tenderdə "Global Engineering Management Company" MMC qalib gəlib və bu şirkətə 212,4 min manat ödəniləcək.
Xatırladaq ki, MİDA-nın sosial evlərinin tikintisinə Bakıda Yasamal ərazisindən başlayıb və sonradan bu binalar Hövsan qəsəbəsində də tikilir.
Bakıdan kənarda isə sosial evlər Gəncədə inşa olunaraq satışa çıxarılıb. Hazırda Sumqayıt və Lənkəranda da sosial evlər tikilir.
Yevlax bu siyahıda sosial evlərin tikildiyi 5-ci şəhər olacaq.
Hələlik Yevlaxda neçə bina və mənzilini tikiləcəyi açıqlanmayıb, bu məlumatlar indiki tenderdə qalib gələn şirkətin hazırlayacağı layihədə məlum olacaq. Amma Lənkəranda 1,5 hektar ərazidə inşa edilən kompleksdə 9 mərtəbəli 5 bina və 240 mənzil olacaq, bunlardan 32 studiya, 36-sı 2 otaqlı, 104-ü 3 otaqlı və 68-i 4 otaqlı olacaq. Studioların sahəsi 40,1 m², 2 otaqlıların sahəsi 57,68 – 57,70 m², 3 otaqlıların sahəsi 72,82 – 76,74 m², 4 otaqlıların sahəsi isə 98,70 – 114,61 m² nəzərdə tutulur.
Qeyd edək ki, Bakıda sosial evlər kvadratı 925 manatdan, Gəncədə isə 850 manatdan satışa çıxırılıb. Hələlik Lənkərandakı evlərin hansı qiymətə satışa çıxarılacağı açıqlanmayıb.
