Nazirlər Kabineti “Azərbaycan Respublikasının Mənzil İnşaatı Dövlət Agentliyinin vəsaiti hesabına inşa edilən yaşayış binalarının və digər tikinti obyektlərinin podratçılarına tamamlanmış işlər üzrə ödənişin həyata keçirilməsinə yol verilən tikinti işlərinin mərhələləri və ödəniş şərtləri”nin təsdiq edib.
 
ELƏCƏ DƏ BAX: Bina tikənlər vahid vergi rejimində fəaliyyət göstərəcəklər
 
FED.az-ın məlumatına görə, qərara əsasən inşa edilən yaşayış binalarının və digər tikinti obyektlərinin tikinti mərhələləri aşağıdakılardır:
 
- relyefin təşkili planına uyğun olaraq, tikinti üçün ayrılmış ərazinin şaquli planlaşdırılması;
 
- tikintinin təşkili layihəsinə uyğun olaraq, müvəqqəti bina və qurğuların tikintisi və obyektlər üzrə tikinti sahəsində torpaq işləri;
 
- bünövrənin və yeraltı konstruksiyaların quraşdırılması;
 
- bünövrənin  və  torpaqla  təmasda  olan  yerlərin  hidroizolyasiyası  və  torpağın  əks doldurulması;
 
- hər mərtəbə üzrə konstruktiv elementlərin quraşdırılması;
 
- mərtəbələr üzrə xarici, daxili, arakəsmə və şaxta divarlarının hörülməsi, habelə suvanması;
 
- mərtəbələr üzrə pəncərə, vitraj və qapıların qoyulması;
 
- daxili mühəndis-kommunikasiya təminatı sisteminin quraşdırılması və sınağı (ayrı-ayrılıqda qaz, istilik, rabitə, elektrik, su və kanalizasiya təminatı vasitələri və qurğuları);
 
- dam örtüklərinin qurulması və fasadda tamamlama işləri;
 
- mərtəbələr üzrə döşəmələrin qurulması;
 
- liftlərin quraşdırılması və işə buraxılması;
 
- mərtəbələr üzrə daxili  tamamlama-bəzək işləri;
 
- xarici mühəndis-kommunikasiya təminatı sisteminin çəkilməsi və sınağı;
 
- abadlıq və yaşıllaşdırma işləri.
 
İnşa edilən yaşayış binalarının və digər tikinti obyektlərinin podratçılarına tamamlanmış işlər üzrə tikinti mərhələlərinə uyğun ödəniş şərtlərinə (sahəxarici mühəndis-kommunikasiya təminatı sisteminin quraşdırılması işləri istisna olmaqla) gəlincə, müqavilə şərtlərinə əsasən sifarişçi tərəfindən müqavilə qiymətinin 30 faizi qədər vəsait avans olaraq podratçı təşkilata ödənilir. Yerinə yetirilmiş tikinti-quraşdırma işlərinin təhvili və qəbulu üzrə akt tərtib olunur və həmin akt əsasında xərclərin və yerinə yetirilmiş tikinti-quraşdırma işlərinin dəyəri haqqında arayış müvafiq qaydada rəsmiləşdirilir. Arayış  xərclərin və yerinə yetirilmiş tikinti-quraşdırma işlərinin dəyərinin ödənilməsi üçün əsas sənəd sayılır. Förülmüş tikinti işləri üzrə təqvim ayında ən azı bir dəfə akt və arayış əsasında ödəniş həyata keçirilir. işlər mərhələlər üzrə podrat müqaviləsinin şərtlərinə zidd olaraq keyfiyyətsiz yerinə yetirildikdə, nöqsanlar aradan qaldırılanadək yerinə yetirilmiş tikinti-quraşdırma işləri sifarişçi tərəfindən qəbul edilmir. ;
 
Tikinti obyektinin istismarına icazə verildikdən sonra podrat müqaviləsinin şərtlərinə uyğun olaraq, təminat müddətinin sonunda müqavilə qiymətinin qalıq hissəsi ödənilir. Tikinti obyektlərinin sahəxarici mühəndis-kommunikasiya təminatı sisteminin quraşdırılması üçün podratçılara müvafiq olaraq quraşdırma işlərinin ilkin mərhələsində ən çoxu 20 faiz avans ödənildikdən sonra tamamlanmış və təhvil verilmiş işlərə görə qalıq vəsait ödənilir. Obyektin tikintisi müddətində Azərbaycanda inflyasiya dərəcəsində və ya dövlət tərəfindən tənzimlənən qiymətlərdə baş verə biləcək dəyişikliklərlə bağlı rəsmi məlumatlara əsasən kompensasiyanın ödənilməsi ilə əlaqədar olan məsələlərə mövcud qanunvericiliyin tələblərinə uyğun olaraq podrat müqaviləsində əvvəlcədən nəzərdə tutulmuş şərtlər çərçivəsində baxılır.