Əmlak Məsələləri Dövlət Komitəsi noyabrın 6-da keiriləcək özəlləşdirmə hərracına çıxarılan əmlakları açıqlayıb. Komitədən FED.az-a bildirilib ki, bu dəfə hərraca 79 əmlak çıxarılıb. Onlardan 17-si səhmdar cəmiyyətin səhmləri, 33-ü kiçik müəssisə və obyekt, 23-ü qeyri-yaşayış sahələri, 6-sı avtomobildir.
Özəlləşməyə çıxarılan səhmdar cəmiyyətləri respublikanın müxtəlif şəhər və rayonlarında yerləşir. İnvestorlar kənd təsərrüfatı, təmir-tikinti, sənaye və digər sahələrə aid olan bu səhmdar cəmiyyətlərinin 30-45%-lik səhm paketləri üzrə hərracda iştirak edə bilər.
Ümumi faydalı sahəsi 12 kv.m ilə 11 min 266 kv.m aralığında olan kiçik dövlət müəssisə və obyektləri sərmayəçilər üçün yaxşı gəlir mənbəyidir. Onlardan biri Şəki rayonu, Şorsu kəndindəki Əmlak kompleksidir. Geniş torpaq ərazisi ilə birgə özəlləşdiriləcək obyektin ümumi faydalı sahəsi 2 min 889 kv.m-dir. Biznes fəaliyyəti üçün əlverişli ola biləcək digər dövlət müəssisəsi Oğuz rayonu, Kərimli kəndində yerləşir. Bu Anbar kompleksinin ümumi faydalı sahəsi 3 min 101 kv.m-dir.
Hərraca çıxarılan əmlakların qiyməti isə 3,3 min manatdan başlayaraq 275 min manata qədər dəyişir. Məsələn, Bakının mərkəzində, Nəsimi rayonu ərazisində 12,5 kvadratmetrlik zirzəminin qiymət 3,7 min manatdır. Bu obyekti almaq üçün hərraca 375 manat beh ödəyib hərraca qatılmaq tələb olunur.
Hərraca çıxarılan qeyri-yaşayış sahələrindən 12-si Bakıda, 4-ü Sumqayıtda, digərləri isə Gəncə, Ağdaş və Daşkəsəndə yerləşir. Bu kateqoriyadan olan dövlət əmlaklarının ümumi faydalı sahəsi 5,8 kv.m ilə 287,9 kv.m intervalındadır. Sumqayıt şəhəri, 18-ci mikrorayon, bina 1 ünvanındakı qeyri-yaşayış sahəsinin ümumi faydalı sahəsi 29.3 kv.m-dir. Bu dövlət əmlakından ictimai iaşə və ya ofis obyekti kimi istifadə etmək olar. Özəlləşməyə çıxarılan Qaz, Kamaz və Fiat markalarına aid nəqliyyat vasitələrinin buraxılış tarixləri 1995-2007 illərdir.
Prosesdə iştirak etmək istəyən şəxslər komitənin saytı (emdk.gov.az) və Özəlləşdirmə portalındakı (privatization.az) siyahıdan seçim edərək dövlət əmlaklarını sifariş verə bilər. Şəffaflığın təmin olunduğu hərraclarda təyin olunan vaxtda sifarişçilərlə bərabər, ziyarətçilərin də iştirak imkanı mövcuddur.
Qeyd edək ki, Əmlak Məsələləri Dövlət Komitəsi tərəfindən sabah növbəti hərrac keçiriləcək. Budəfəki hərraca ümumilikdə 67 dövlət əmlakı çıxarılıb. Onlardan 17-si səhmdar cəmiyyəti, 33-ü kiçik dövlət müəssisə və obyekti, 17-si qeyri-yaşayış sahəsidir. Komitə investorları, mülkiyyət sahibi olmaq istəyən bütün şəxsləri, eləcə də ziyarətçiləri hərraclarda iştirak etməyə və prosesi izləməyə dəvət edir.
