Ölkəmizdə daşınmaz əmlakın inkişafı, investisiyası və idarə olunması sahəsində aparıcı şirkətlərdən biri olan “PMD Group” MMC bu ilki Xəzər İnşaat Həftəsinin Baş Sponsorudur.

FED.az xəbər verir ki, 14-16 oktyabr tarixlərində Bakı Ekspo Mərkəzində təşkil olunan Xəzər İnşaat Həftəsi regionda inşaat, bərpa, memarlıq və infrastruktur sahələrinin ən böyük əməkdaşlıq və innovasiya platforması kimi tanınır.

14 oktyabr tarixində fəaliyyətinə start verilən sərgi yerli və beynəlxalq şirkətləri bir araya gətirərək inşaat sənayesində yeni texnologiyaların təqdimatı, tərəfdaşlıqların qurulması və bərpa proseslərinin sürətləndirilməsi üçün mühüm imkanlar yaradır.

Sərginin ilk günündə “Qarabağın dirçəlişi və Azərbaycanın yeni inkişaf modeli” mövzusunda panel müzakirəsi keçirilmişdir. Paneldə Qarabağ Dirçəliş Fondunun İdarə Heyətinin sədri Rəhman Hacıyev və “PMD Group” MMC-nin Daşınmaz Əmlakın İnkişafı departamentinin direktoru Kamil Əliyev də daxil olmaqla 6 məruzəçi yer almışdır. Müzakirə zamanı Qarabağda aparılan şəhərsalma prosesləri, dayanıqlı inkişaf yanaşmaları və özəl sektorun bu prosesdə rolu xüsusilə vurğulanmışdır.

Eləcə də, Bakı Ekspo Mərkəzində təqdim olunan PMD Group-a məxsus “Ağdam Rezidens” və “Baku Tower” layihələri sərgi iştirakçıları tərəfindən böyük maraqla qarşılanmışdır. Ziyarətçilərə hər iki layihənin üstünlükləri, konsepsiyası və gələcək inkişaf planları barədə ətraflı məlumat təqdim olunmuşdur.

Ağdamın mərkəzində inşa edilən “Ağdam Rezidens” layihəsi regionun ilk müasir yaşayış kompleksi kimi xüsusi diqqət çəkir. Dövlətimiz tərəfindən keçmiş məcburi köçkünlərin öz doğma torpaqlarına qaytarılması istiqamətində böyük miqyaslı bərpa və yenidənqurma işləri uğurla həyata keçirilərkən, PMD Group da özəl sektor nümayəndəsi kimi bu prosesi “Ağdam Rezidens” və digər layihələri ilə dəstəkləyir. Bu layihə təkcə mənzil tikintisi deyil, yeni icmanın formalaşması, müasir həyat tərzinin yaradılması və Qarabağın dirçəlişinə real töhfə kimi təqdim olunur.

Bununla yanaşı, PMD Group-un portfelində yer alan və Cənubi Qafqazın ən hündür binası olan “Baku Tower” layihəsi də sərgidə nümayiş etdirilmişdir. Müasir memarlığı və funksional kommersiya sahələri ilə seçilən bu bina ölkənin biznes infrastrukturunun inkişafına xidmət edən strateji layihə kimi dəyərləndirilir.

PMD Group sərgidə layihələrini nümayiş etdirməklə yanaşı, Qarabağdakı fəaliyyətinin bölgənin bərpası və uzunmüddətli inkişafına xidmət edən strateji missiyaya əsaslandığını vurğulayır. Şirkət azad edilmiş ərazilərdə müasir yaşayış mühitləri, infrastruktur və dayanıqlı şəhərsalma modelini tətbiq edərək regionun bərpasına töhfə verir.