Azərbaycan Respublikası Prezidentinin tapşırıqlarına uyğun olaraq, yanvarın 25-də Əmlak Məsələləri Dövlət Komitəsinin (ƏMDK) sədri Kərəm Həsənov Qobustan şəhərində vətəndaş qəbulu keçirib.
Komitədən FED.az-a bildiriblər ki, qəbulda Qobustan rayonu ilə yanaşı, Şamaxı, Ağsu, Hacıqabul rayonlarından olan vətəndaşların müraciətlərinə baxılıb. ƏMDK-nın müvafiq qurumlarının rəhbərlərinin də iştirak etdiyi qəbulda vətəndaşların müraciətləri əsasən, daşınmaz əmlakların qeydiyyata alınması, torpaqların təyinatına və faktiki vəziyyətinə uyğun istifadəsi, dövlət əmlaklarının özəlləşdirilməsi ilə bağlı olub. O cümlədən, hərraclarda iştirak, torpaqların elektron kadastr uçotu, dövlət əmlakının icarəyə götürülməsi ilə bağlı müraciətlər də səsləndirilib.
Vətəndaşların fərdi müraciətlərini diqqətlə dinləyən komitə sədri bütün məsələlərin qanunvericiliyə uyğun həlli istiqamətində tapşırıqlarını verib. Bəzi müraciətlər dərhal həll edilib. Araşdırılma tələb edən müraciətlər nəzarətə götürülüb və onların həlli istiqamətində struktur bölmələrin rəhbərlərinə müvafiq göstərişlər verilib. Komitənin fəaliyyət istiqamətlərinə aid olmayan məsələlər isə aidiyyəti üzrə göndərilməsi üçün qeydiyyata alınıb.
Torpaqların dəqiq sərhədlərinin müəyyən edilməsi ilə bağlı vətəndaş müraciətlərini cavablandıran komitə sədri dövlət başçısının tapşırıqlarına uyğun olaraq, ölkə üzrə aparılan Torpaqların Elektron Kadastr Uçotu işlərindən danışıb. Bildirib ki, Əmlak Məsələləri Dövlət Komitəsi tərəfindən reallaşmaqda olan torpaqların elektron kadastr işlərinin nəticələrindən artıq vətəndaşlar da yararlanır. Pilot layihə ilk olaraq Salyan rayonunun Parça Xələc kəndində baş tutub. Bununla 600-ə yaxın pay torpaqlarının hüquqi mülkiyyətçilərinə torpaq sahələrinin koordinatlarını, yerləşmə vəziyyətini, kadastr planını dəqiq əks etdirən bildirişlər paylanılıb. Bu işlər nəticəsində vətəndaşlar torpaqların dəqiq sərhədlərini müəyyən edə bilir, hüquqi sənədlə faktiki istifadə vəziyyəti arasında uyğunsuzluq aradan qaldırılır.
Komitə sədri qeyd edib ki, geniş mülkiyyətçi kütləsinin faydalanması üçün bu layihə digər rayonlarda da həyata keçiriləcək. Qeyd olunub ki, mütərəqqi texnologiyaların tətbiqi ilə torpaq istifadəsinə nəzarət peyk vasitəsilə aparılacaq. Belə ki, Peyk Nəzarət Sistemi qurulur. Bununla da torpaq inzibatçılığı və istifadəsinə nəzarət tədbirləri effektiv aparılacaq, səmərəlilik prinsipi təmin olunacaq.
Qəbulda K.Həsənov vətəndaşlara göstərilən bütün xidmətlərdə məmnunluğun, çevikliyin və şəffaflığın təminatı istiqamətində görülməli işlərlə bağlı komitənin ərazi idarələri və tabeli qurumlarının yerli şöbələrinin rəhbərlərinə tapşırıqlarını verib. Bildirib ki, hər bir vətəndaş müraciətləri operativ formada həll olunmalı, vətəndaş maraqları qanunvericiliyə uyğun olaraq tam təmin edilməlidir.
Komitə sədrinin regionlarda vətəndaş qəbulları qarşıdakı aylarda da davam etdiriləcək.
