İpoteka və Kredit Zəmanət Fondu 2019-cu ilin yanvar-sentyabr aylarını 16 milyon 967 min manat mənfəətlə başa vurub. Bu, illik müqayisədə 5,4% azdır.
FED.az Report-a istinadən xəbər verir ki, İpoteka və Kredit Zəmanət Fondunun (İKZF) cəmi aktivləri bu il oktyabrın 1-nə 1 milyard 188 milyon 497 min manat təşkil edib.
Eləcə də bax:Fondun gələn il üçün büdcəsi - TƏSDİQ EDİLİB
Fondun maliyyə hesabatına görə, bu, ötən ilin eyni dövrü ilə müqayisədə 3% çoxdur.
İKZF-in aktivlərinin 81,1%-ni və yaxud 963 milyon 529 min manatını ipoteka kreditləri təşkil edib. Son 1 ildə Fondun kredit portfeli 18,9% böyüyüb.
Hesabat dövründə İKZF-in öhdəlikləri 9,8% azalaraq 538 milyon 391 min manata, o cümlədən borc öhdəlikləri 11,6% azalaraq 513 milyon 439 min manata düşüb, Fondun balans kapitalı isə 22,4% artaraq 650 milyon 106 min manata çatıb.
Bu ilin 9 ayında İKZF-in faiz gəlirləri 36 milyon 813 min manat (ötən ilin 9 ayına nisbətən 5,5% çox), faiz xərcləri 14 milyon 644 min manat (15% çox), dəyərsizləşmə üzrə zərəri 434 min manat (47,9% az), haqq və komissiya xərcləri 741 min manat (30% çox), digər gəlirləri 968 min manat (9,95% az), insan resursları üzrə xərcləri 3 milyon 86 min manat (31,7% çox), inzibati və digər xərcləri isə 1 milyon 909 min manat (24,85% çox) təşkil edib. Son nəticədə Fond yanvar-sentyabr aylarını 16 milyon 967 min manat mənfəətlə başa vurub. Bu, illik müqayisədə 5,4% azdır.
