Banner

İnşaat və əmlak

İKZF-nin nizamnamə kapitalı - 25,3% Artırılır - FƏRMAN

İKZF-nin nizamnamə kapitalı - 25,3% Artırılır - FƏRMAN | FED.az
09:20 4 May 2021

İpoteka və Kredit Zəmanət Fondunun (İKZF) nizamnamə kapitalı 25,3% - 798 milyon manata qədər artırılır.

Eləcə də bax: Azərbaycanda dövlət xətti ilə ipoteka kreditləşməsi apreldə - 10% Azalıb

FED.az xəbər verir ki, Prezident İlham Əliyev dünən “Azərbaycan Respublikasının İpoteka və Kredit Zəmanət Fondunun Nizamnaməsi”ndə dəyişiklik edilməsi haqqında” Fərman imzalayıb.

Dəyişikliyə əsasən, Fondun nizamnamə kapitalının 637 milyon manatdan 798 milyon manata qədər artırılması aşağıdakı iki mənbə hesabına həyata keçirilir:

- “Koronavirus (COVID-19) pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Azərbaycan Respublikası Prezidentinin 2020-ci il 19 mart tarixli 1950 nömrəli Sərəncamının 10.2-ci bəndinə uyğun olaraq təsdiq edilmiş tədbirlər planına əsasən güzəştli ipoteka kreditləri üçün ayrılan 90 milyon manat hesabına;

- İpoteka və Kredit Zəmanət Fondunun nizamnamə kapitalının artırılması (güzəştli ipoteka kreditlərinin maliyyələşdirilməsi) üçün 2021-ci ilin dövlət büdcəsindən Fonda ayrılan vəsaitin 71 milyon manatı hesabına.

Prezident İlham Əliyev 2017-ci il dekabrın 26-da “Azərbaycan İpoteka Fondu” ASC-nin ləğv edilməsi və İpoteka və Kredit Zəmanət Fondunun yaradılması haqqında fərman imzalayıb.

Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 150 min manatı keçməməlidir. Kredit illik 8%-dən çox olmayan dərəcə ilə verilir. İlkin ödəniş 15-25% təşkil edir.

Dövlət büdcəsindən yalnız sosial ipoteka maliyyələşdirilir. Onun maksimum məbləği 100 min manat təşkil edir, illik faiz dərəcəsi 4%-dən çox deyil. Müddəti 30 ilə qədərdir. İlkin ödəniş 10% təşkil edir. (İnterfaks)

Banner
Banner

Digər xəbərlər