"Müvafiq icra orqanlarından sərəncam alan hər bir karxana istismarçısına ekoloji sənədlər veriləcək".
FED.az xəbər verir ki, bunu açıqlamasında Ekologiya və Təbii Sərvətlər Nazirinin müavini Novruz Quliyev deyib.
O bildirib ki, daş karxanalarının istismari üçün qanunvericilikdə nəzərdə tutulmuş qaydalara uyğun sənədləşmə işləri davam edir: "Abşeron yarımadasında fəaliyyət göstərən daş karxanalarında Ekologiya və Təbii Sərvətlər Nazirliyinin (ETSN) əməkdaşları tərəfindən iyul-avqust aylarında monitorinq keçirilib və əksər daş karxanalarının fəaliyyətində nöqsanlar aşkar olunaraq qanunamüvafiq aktlar tərtib olunub: "Nazirlik tərəfindən görülən tədbirlər karxana sahibləri və istismarçılarda bəzi suallar doğurduğu üçün sentyabrın 3-də nazirliyin binasında onlarla görüş keçirilib. Əksər karxana istismarçılarının torpaq ayırmaya dair sərəncamlarının olmadığı, nazirlik tərəfindən verilən ekoloji və geoloji sənədlərin vaxtının bitdiyi, bəzi karxana istismarçılarının isə ümumiyyətlə heç bir sənədinin olmadığı bir daha onların diqqətinə çatdırılıb. Yol verdikləri nöqsanları başa düşdükləri, qoyulan qanuni tələbləri anlayışla qarşıladıqları nəzərə alınaraq nazirlik karxana istismarçılarına mövcud olan nöqsanların aradan qaldırılması, sənədlərinin tam qaydaya salınması üçün əlavə 45 gün vaxt verib".
Nazirlik tərəfindən karxana istismarçılarının nəzərinə çatdırılır ki, müvafiq icra orqanlarından sərəncam alan hər bir fiziki və hüquqi şəxsə ETSN ekoloji sənədlər veriləcək: "Torpaq ayırmaya dair sərəncamı olan istismarçılar “Bərəkət 98”, “Gülbaxt TMK” və sairələri ekoloji və geoloji sənədlərin alınması üçün Ekspertiza idarəsinə müraciət edib. Yaxın günlərdə sənədlər onlara təqdim olunacaq və hər bir istismarçıya işlərinin aparılması zamanı ətraf mühitə mənfi təsirin azaldılması məqsədilə müasir texnologiyalardan istifadə edilməsi barədə tövsiyələr veriləcək. Karxanaların müasir metodlar ilə istismarına keçməsi üçün müəyyən vaxt veriləcək".
