Mənzil İnşaatı Dövlət Agentliyinin növbəti layihəsi – Gəncə Yaşayış Kompleksində yerləşən güzəştli mənzillərin satışına hazırlıq işləri çərçivəsində, agent bankların və qiymətləndirici şirkətlərin nümayəndələri ilə Kompleksin ərazisində görüş təşkil olunmuşdur.
Eləcə də bax: Gəncədə 188 güzəştli mənzil satışa çıxarıldı – AYLIQ 207 MANATDAN
FED.az xəbər verir ki, tədbirdə 23 dekabr 2021-ci il tarixində Gəncə Yaşayış Kompleksində satışa çıxarılacaq güzəştli mənzillər nümayiş etdirilərək, istifadə olunan inşaat materialları və təmir növləri haqqında ətraflı məlumat verilmişdir.
23 dekabr 2021-ci il tarixində Gəncə Yaşayış Kompleksində yerləşən güzəştli mənzillərin satışına başlanılacaq və 30 dekabr 2021-ci il tarixinədək davam edəcəkdir. “Azərbaycan Respublikasının Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”na uyğun olaraq gözləmə qaydasında mənzillərin seçimi 27 dekabr 2021-ci il tarixində başlayacaq və 30 dekabr 2021-ci il tarixinədək davam edəcəkdir. Mənzillərin əldə edilməsi “Elektron hökumət” portalı üzərində (www.e-gov.az) “Güzəştli mənzil” sistemi vasitəsilə elektron qaydada həyata keçirilir. Bütün mənzillər tam təmirli, mətbəx mebeli, kombi isitmə sistemi (kombi cihazı daxil olmaqla), su, qaz və elektrik sayğacları ilə təmin edilmiş vəziyyətdə təklif olunur.
Məlumat verildi ki, Gəncə şəhərində güzəştli mənzillər haqqında məlumatların ətraflı təqdim olunduğu https://gence.mida.gov.az internet səhifəsi və onun mobil versiyası istifadəyə verilmişdir. İnternet səhifə hər kəs üçün Gəncə şəhərində güzəştli mənzillər barədə ətraflı məlumat əldə etmək imkanını təmin edir.
Tədbirdə iştirak edən şəxslər belə görüşün keçirilməsi təşəbbüsünü yüksək qiymətləndirdilər və layihədə gələcək sakinlərin rahat və sağlam yaşayışı üçün bütün zəruri şəraitin yaradıldığını vurğuladılar.
“Azərbaycan Respublikasının Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”na əsasən mənzilin dəyərinin ipoteka krediti hesabına ödəniş üsulunu yalnız ilkin razılıq qərarını alaraq elektron kabinetində yerləşdirilməsini təmin etmiş şəxs seçə bilər.
Mənzilləri güzəştli ipoteka krediti hesabına əldə etmək istəyən “Güzəştli mənzil” sistemində elektron kabineti olan vətəndaşlar Azərbaycan Respublikasının İpoteka və Kredit Zəmanət Fondunun müvəkkil bankları sırasına daxil olan və MİDA” MMC ilə əməkdaşlıq müqaviləsi imzalamış “Kapital Bank” ASC, “Azər-Türk Bank” ASC, “Bank VTB (Azərbaycan)” ASC, “Azərbaycan Beynəlxalq Bankı” ASC, “TuranBank” ASC, “PAŞA Bank” ASC, "Rabitəbank" ASC və “Günay Bank” ASC-nin təqdim etdiyi güzəştli ipoteka kreditindən yararlana bilərlər.
Vətəndaşların rahatlığını təmin etmək məqsədilə, bu kredit təşkilatlarının müvafiq filiallarında güzəştli ipoteka kreditinin əldə edilməsi ilə bağlı sualların cavablandırılması işi həyata keçirilir. Güzəştlə mənzil əldə etmək hüququna malik vətəndaşlar bu siyahıda göstərilən ünvanlardan birinə yaxınlaşaraq və ya əlaqə nömrələrinə zəng edərək mövzu ilə bağlı suallara cavab tapa bilərlər.
