İnşaat və əmlak

Daşınmaz əmlakın səyyar qeydiyyatı xidmətləri bu həftə 5 bina üzrə 2103 mənzili - ƏHATƏ EDƏCƏK

Daşınmaz əmlakın səyyar qeydiyyatı xidmətləri bu həftə 5 bina üzrə 2103 mənzili - ƏHATƏ EDƏCƏK | FED.az
11:47 9 Sentyabr 2019

Əmlak Məsələləri Dövlət Komitəsi (ƏMDK) tərəfindən reallaşdırılan “Əmlakını qeydiyyata al və mülkiyyətinə sahib ol” kampaniyası ilə səyyar xidmətlər bu həftə 5 bina üzrə 2103 mənzili əhatə edəcək.

Komitədən FED.az-a bildirilib ki, Prezident İlham Əliyevin 2019-cu il fevralın 19-da imzaladığı “Bəzi çoxmənzilli binaların istismarına icazə verilməsinin sadələşdirilməsi haqqında” Fərmana uyğun olaraq ƏMDK tərəfindən istismarına icazə verilmiş binalardakı mənzillərin dövlət qeydiyyatına alınması xidmətləri birbaşa ünvanlarda göstərilir.

Eləcə də bax: Daşınmaz əmlakın səyyar xidmətlərinin bu dəfə hansı rayonda olacağı - MƏLUM OLUB

Bu həftə “Əmlakını qeydiyyata al və mülkiyyətinə sahib ol” kampaniyası ilə intensiv qeydiyyat xidmətləri Bakı şəhəri üzrə 5 müxtəlif ünvanda göstəriləcək. Belə ki, sosial aksiya sentyabrın 9-dan 13-dək Səbail, Nizami, Yasamal və Nəsimi rayonlarındakı bir neçə çoxmənzilli binalarda keçiriləcək.

Kampaniya sentyabrın 9-da Səbail rayonu, A.Abbaszadə küçəsindəki 18 mərtəbəli, 561 mənzilli binada, sentyabrın 10-da Nizami rayonu, Çobanzadə, Gəncəvi və Nəsimi küçələrinin kəsişməsi, 2532 məhəllədəki 17 mərtəbəli, 128 mənzilli binada reallaşacaq. Daşınmaz əmlakın səyyar qeydiyyatı xidmətlərindən sentyabrın 11-də Yeni Yasamal, D.Bünyadzadə küçəsindəki 17 mərtəbəli, 855 mənzilli binanın, sentyabrın 12-də Səbail rayonu, 4-cü Badamdar 6012 məhəllədəki 14 mərtəbəli, 286 mənzilli binanın, sentyabrın 13-də isə Nəsimi rayonundakı Abay döngəsi, 360-cı məhəllədəki 18 mərtəbəli, 273 mənzilli bina sakinləri yararlanacaq.

Mənzillərin dövlət qeydiyyatına alınması xidmətlərindən ünvanlarındaca istifadə etmək istəyən vətəndaşlar göstərilən tarixlərdə, saat 09:00-dan 17:00-dək şəxsiyyət vəsiqəsi, maliyyə arayışı, protokoldan çıxarış kimi ilkin sənədlər ilə birgə binanın həyətindəki səyyar avtobusa yaxınlaşa bilərlər.

Digər xəbərlər