Əmlak Məsələləri Dövlət Xidməti mayın 10-da dövlət əmlaklarının satışı üzrə yeni hərrac elan edib.

FED.az xəbər verir ki,  hərraca 15  kiçik dövlət müəssisə və obyekti, 1 yarımçıq tikili çıxarılıb.

Hərraca çıxarılan kiçik dövlət müəssisəsi və obyektləri Bakıda, Gəncə, Lənkəran, Şəmkir, Balakən və digər rayonlarda yerləşir. Satışa çıxarılan əmlaklar xidmət, sənaye sahələrinə aiddir. Tikililərin ümumi faydalı sahəsi isə 16 kvadratmetrlə 9298 kvadratmetr arasında dəyişir.

Bu dəfə satışa çıxarılan ən bahalı əmlak Balakən şəhərində yerləşən “Qubek Otel”dir. Adı çəkilən obyekt 9 milyon 100 min manata təklif olunur. Qeyd edək ki, Əmlak Xidməti sözügedən oteli artıq bir neçə ildir ki, satmağa hazırlaşır. Vaxtilə Dövlət Neft Şirkətinin (SOCAR) balansında olan otel 2018-ci ildən bəri bir neçə dəfə hərraca çıxarılıb. İlk qiyməti 18 milyon manat olan otel satılmadığına görə, qiymət 9,1 milyon manatadək aşağı düşüb. 2018-ci ildən bəri otel elə bu qiymətə hərraca çıxarılır.

Otellə yanaşı, budəfəki hərraca Mərkəkandakı eyni adlı restoran da satışa çıxarılıb. 177 kvadratmetr sahəsi olan restoranın ilkin qiyməti 300 min manatdır. Qeyd edək ki, «Qubek» oteli kimi, «Mərdəkan» restoranı da artıq bir neçə dəfə hərraca çıxarılıb, amma satılmayıb.

Bu dəfə hərracda Qaradağda yerləşən Şadlıq evi adlı əmlak da satışa çıxarılıb. 7,4 sot torpaqda yerləşən və 300 kvadratmetr sahəsi olan əmlakın qiyməti 39 min manatdır.

Hərracda Gəncənin mərkəzindəki ikimərtəbəli istehsal sexi (156 min manat),  İmişlinin mərkəzində yerləşən keçmiş yun qəbulu məntəqəsi (20 min manat), eləcə də Şəmkir, Goranboy, İsmayıllı, Neftçala, Qəbələ və Lənkərandan obyektlər satışa çıxarılıb.

Neftçalada satışa çıxarılan obyekt bərbərxanadır – Bankə qəsəbəsində 16 kvadratmetrlik tikininin qiyməti 800 manatdır.

Qeyd edək ki, əmlak hərracında iştirak etmək üçün hərraca 3 iş günü qalana qədər müraciət etmək lazımdır. Yəni məsələn mayın 10-da keçirilən bu hərraca qatılmaq üçün mayın 4-dən gec olmayaraq qeydiyyatdan keçmək lazımdır. Hərraca qatılmaq üçün burada göstərilən ilkin qiymətin 10%-i qədər beh ödənilməlidir. Qalib gəlməyəndə beh sahibinə qaytarılır. 

Mayın 10-da hərraca çıxarılan dövlət müəssisələri və obyektləri aşağıdakılardır.

10 may 2022-ci il tarixdə saat 10:00-da respublikanın şəhər və rayonlarında təkrar hərraca çıxarılacaq kiçik dövlət müəssisə və obyektlərinin siyahısı