Əmlak Məsələləri Dövlət Komitəsinin (ƏMDK) 27 fevral tarixində keçirdiyi özəlləşdirmə hərracı Bakı şəhərindəki obyektlərdən biri ilə bağlı böyük rəqabətli yadda qaldı. Komitədən FED.az-a verilən məlumata görə, hərracda Bakının Nəsimi rayonunun Dilarə Əliyeva küçəsində yerləşən və sahəsi 55 kvadratmetr olan qeyri-yaşayış sahəsinin hərracı üzrə təkliflər ard-arda səsləndirilib. Əmlaka 3 nəfər sifariş verib. Həmin obyektin özəlləşdirilməsi ilə bağlı 20 dəqiqə rəqabətli hərrac aparılıb. İnvestorlar arasında sağlam çəkişmə əmlakın qiymətini 3 dəfəyədək artırıb. Belə ki, ilkin start qiyməti 250 min manata olan adı çəkilən obyektə ən son 631 min manat təklif edilib.
Obyektlərin hərracında müşahidə baş verən rəqabət avtomobillərdə də davam edib. 2 nəfərin sifariş verdiyi VAZ-2106 markalı avtomobilin ilkin start qiyməti 1200 manatdan 1300 manatadək yüksəlib. Maraqlıdır ki, bu maşını almaq istəyənlərdən biri hərraca onlayn qatılıb.
Budəfəki hərracda özəlləşən 10 dövlət əmlakından 3-ü kiçik dövlət müəssisəsi və obyekti, 3-ü qeyri-yaşayış sahəsi, 1-i iyarımçıq tikili, 3-ü isə nəqliyyat vasitəsidir. Özəlləşən kiçik dövlət müəssisələri müvafiq olaraq Bakı, Şirvan və İmişlidə yerləşir. Bakının Kürdəxanı qəsəbəsində yerləşən 7 saylı iaşə obyekti xidmət sahəsində investorlar üçün yaxşı gəlir gətirə bilər. Adı çəkilən obyektin ümumi faydalı sahəsi 214 kv.m, torpaq sahəsi isə 250 kv.m-dən çoxdur. Əmlak torpaq sahəsi ilə birgə özəlləşdirilib. Bundan başqa İmişli rayonunda yerləşən qeyri-yaşayış binası da sahibi üçün əlverişli əmlakdır.
Hərracda özəlləşən qeyri-yaşayış sahələri Bakının Nərimanov və Nəsimi rayonlarında, digəri isə Gəncə şəhərində yerləşir.
Özəlləşdirilən maşınların da markaları müxtəlifidir. Avtomobillərin buraxılış tarixləri isə 1989-2005-ci illəri əhatə edir.
Keçirilən hərracların nəticələri ilə tanış olmaq üçün komitənin rəsmi saytı olan emdk.gov.az və privatization.az portalının müvafiq bölməsinə daxil olmaq kifayətdir.
Büdcənin yükünü azaldır
Dövlət əmlaklarının özəlləşdirilməsi ilə dövlət büdcəsinin üzərinə düşən yük və əlavə dövlət xərcləri azalır. Həmin müəssisələrə böyük həcmli investisiyaların qoyulmasına zəmin yaranır. Sərmayə yatırımı bu müəssisələrin modern standartlara uyğun yenidən qurulmasına və müasir şərtlərlə daha keyfiyyətli xidmətlər göstərməsinə imkan verir. Bu isə dövlət büdcəsindən xərclərin azaldılması ilə yanaşı, belə müəssisələrin tam profil üzrə səmərəli fəaliyyətə başlaması və yeni iş yerlərinin açılması deməkdir. Xüsusilə bölgələrdə özəlləşdirilən müəssisələrin yenidən fəaliyyəti regionların sosial-iqtisadi inkişafını daha da sürətləndirir. Regionlarda yeni iş yeri açılmaqla insanların yaşayış səviyyəsində müsbət dinamika müşahidə edilir.
Özəlləşdirilən əmlaklara necə baxmaq olar?
Qeyd edilməlidirki, özəlləşmə prosesində 8 elektron xidmətin tətbiqi əmlak sahibi olmaq istəyən vətəndaşları, investorları özünə cəlb edir. Prosedurun sadə olması da investorların marağını cəlb edən əsas üstünlüklərdən biridir. Hazırda sadə prosedura əsasən hərraca qatılmaq üçün Özəlləşdirmə portalı üzərindən əmlakı seçib sifariş vermək kifayət edir. Portalda hər bir əmlakın mövqeyi, yerləşməsi, mövcud vəziyyəti barədə fotoşəkillər və mətn məlumatları var. İstənilən şəxs hərracda həm iştirakçı qismində qatıla, həmdə ziyarətçi olaraq canlı izləyə bilər. Hərraclarda şəffaflığı artırmaq məqsədilə ictimai nəzarət və səmərəlilik prinsipləri təmin olunur. Ümumilikdə hərracların keçirilmə üsullarının sadələşdirilməsi, prosesə daha optimal yanaşmaların tətbiqi, şəffaflığın təmin olunması investorların cəlb edilməsinə istiqamətlənib.
3 nəfər bir obyekti almaq istədi - 3 DƏFƏ BAHALAŞDI
15:54
27 Fev 2018
