“WhatsApp” messencerində uzun zamandır gözlənilən tərcümə funksiyası istifadəyə verilib. İstifadəçilər artıq xarici dillərdəki mesajları çat daxilində, əlavə xidmətlərə müraciət etmədən asanlıqla tərcümə edə biləcəklər.

FED.az xəbər verir ki, bunun üçün mesajın üzərinə klikləyib menyudan “Tərcümə et” seçimini etmək kifayətdir. Sistem avtomatik olaraq dili müəyyən edir və tərcüməni həyata keçirir.

İlkin mərhələdə Android istifadəçiləri üçün altı dildə (ingilis, ispan, hindi, portuqal, rus və ərəb) tərcümə imkanı yaradılacaq. iPhone sahibləri daha geniş seçimə malik olacaqlar: iOS cihazlarında 19 dil seçimi mövcuddur.

Qeyd etmək vacibdir ki, funksiya sorğu əsasında işləyir, real vaxt rejimində deyil. Digər messencerlərdə oxşar imkanlar uzun müddətdir mövcud olsa da, “WhatsApp”ın çoxmilyonlu auditoriyası üçün bu yenilik ciddi təkmilləşmə olacaq.

Şirkət vəd edib ki, dəstəklənən dillərin siyahısı tədricən genişləndiriləcək və beynəlxalq ünsiyyət bütün istifadəçilər üçün daha əlçatan olacaq. (Banker)