Nəqliyyat, Rabitə və Yüksək Texnologiyalar Nazirliyinin İctimaiyyətlə Əlaqələr Sektorundan FED.az-a daxil olmuş məlumata görə, Memorandumu dünyanın texnologiya nəhəngi Cənubi Koreyanın "Samsung Electronics" şirkəti tərəfindən Azərbaycan nümayəndəliyinin rəhbəri Jae Hun Lee və Azərbaycan Respublikasının Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin direktoru Elnar Əsədov imzalayıb.
Sazişin əsas məqsədi tərəflər arasında əməkdaşlığın möhkəmləndirilməsi və inkişaf etdirilməsidir. Cari ilin sentyabrında tərəflər arasında baş tutmuş görüşün və aparılmış danışıqların nəticəsində imzalanmış bu memoranduma görə, hər iki təşkilat innovativ həllərin və proqram təminatlarının hazırlanması sahəsində birgə çalışacaq.
Memorandum aşağıdakı istiqamətlər üzrə əməkdaşlığı nəzərdə tutur:
-“Samsung” mobil qurğuları üçün proqram məhsullarının hazırlanması və tətbiqi;
-“Samsung” mobil qurğuları əsasında elektron sənəd dövriyyəsi sisteminin hazırlanması və tətbiqi;
-“Samsung” şirkətinin KNOX mobil təhlükəsizlik platforması üzərində müştərək həllərin hazırlanması və tətbiqi;
-“Elektron imza” mobil həllərinin “Samsung” mobil qurğuları üçün hazırlanması və tətbiqi;
-“Samsung” mobil qurğularının ayarları və mobil tətbiqlərinin məsafədən idarə olunmasının təmin edilməsi.
Belə ki, bu əməkdaşlıq çərçivəsində artıq tətbiqinə başlanmış, yerli mütəxəssislər tərəfindən hazırlanan “AzDoc” adlı proqram üçün xüsusi platforma hazırlanır. “AzDoc” müəssisə və təşkilatlarda sənəd dövriyyəsini elektronlaşdırmağa imkan verən yeni bir alətdir. Proqram artıq Nəqliyyat, Rabitə və Yüksək Texnologiyalar Nazirliyi daxilində tətbiq olunur. Gələcəkdə isə bütün dövlət təşkilatları bu proqramla işləyə bilər. Bu proqram “Elektron imza və Elektron sənəd haqqında” qanuna və kargüzarlıq təlimatlarına tam uyğundur. Bu proqramda sənədləri elektron imza ilə imzalamaq da mümkündür.
Beləliklə, “Samsung” şirkəti ilə birgə Məlumat Hesablama Mərkəzi KNOX mobil təhlükəsizlik platforması üzərində mobil imzanın tətbiqini reallaşdırır. Təkmilləşdiriləcək yeni platforma üzərindən istifadəçilər istənilən yerdə sənədlərini oxuya və imzalaya biləcək.
Məlumat Hesablama Mərkəzi sözügedən memorandum əsasında “Samsung” şirkəti ilə birlikdə innovativ proqram təminatlarının, xüsusən də, məsafədən idarəsi mümkün olacaq həllərin hazırlanmasına, “Əşyalar interneti” konseptinə keçid edəcək. Həmçinin, bu əməkdaşlıq çərçivəsində davamlı İKT infrastrukturunun qurulması, İKT sistemlərinin təhlükəsiz inteqrasiyası üzrə təcrübələr mübadiləsi təmin olunacaq. Əməkdaşlıq çərçivəsində istifadəçi autentifikasiyası tələb olunan sistemlərdə tanınma və sənədlərin imzalanaraq ötürülməsi prosesləri maksimum optimallaşdırılacaq.
