“Meta” şirkəti özünün yeni model süni intellektini öyrətmək üçün “Libgen” pirat kitabxanasından istifadə edib. Bu fakt ABŞ-ın “The Atlantic” jurnalının araşdırmaları nəticəsində üzə çıxıb.
FED.az xəbər verir ki, kitabxanada müəllif hüquqları ilə qorunan İsveç əsərləri də daxil olmaqla, 7,5 milyondan artıq kitab var.
Bu, İsveç müəllifləri arasında narazılığa səbəb olub. 53 gənc və uşaq ədəbiyyatı yazıçısı İsveçin mədəniyyət naziri Parisa Liyestranda açıq məktub göndərərək məsələyə müdaxilə etməsini istəyib. Onlar “Meta”dan şəffaflıq gözləyir və hansı əsərlərinin istifadə edildiyini bilmək istəyirlər. Həmçinin, kompensasiya və əsərlərinin istifadəsinə qadağa hüququnun təmin olunması tələb edilir.
“Meta başqalarının əməyindən istifadə edərək yeni məzmun yaradır və bundan pul qazanır. Bizim milyardlarla dollarlıq bir korporasiyaya qarşı özümüzü müdafiə edəcək resurslarımız yoxdur. Mübarizə hökumət səviyyəsində aparılmalıdır”, – deyə məktubu imzalayanlardan İnti Çaves Peres bildirib.
Böyük Britaniyada da bir neçə yazıçı, o cümlədən Nobel mükafatı laureatı Kadzuo İsiquro “Meta”nı oğurluqda ittiham ediblər. “Meta”nın nümayəndəsi “The Guardian” qəzetinə bildirib ki, şirkət bu ittihamlarla razılaşmır və özünü və süni intellekt modelini fəal şəkildə müdafiə edəcək. (Azərtac)
