İlon Maska (Elon Musk) məxsus olan "X" (keçmiş Twitter), ödəniş sistemlərində yeni dövrə başlamağa hazırlaşır.
FED.az xəbər verir ki, "X" tətbiqinin son yeniləmələri fiziki bank kartları üçün yeni kod sətirlərini də ehtiva edir. Bu yenilik platformanın rəqəmsal ödəniş həlləri ilə məhdudlaşmayacağından xəbər verir.
"X"in üzərində işlədiyi ödəniş sisteminin “X Money” adlanacağı və "Visa Direct" ilə əməkdaşlıq çərçivəsində həyata keçiriləcəyi daha əvvəl açıqlanmışdı. İstifadəçilər "X Wallet" hesablarına pul köçürə, öz bank kartlarını birləşdirərək tez pul göndərə və qəbul edə, qalıqlarını bank hesablarına köçürə biləcəklər. Həmçini sistem itirilmiş və ya oğurlanmış kartları bildirmək, kartın kilidlənməsi və parol təyini kimi funksiyaları da əhatə edəcək.
"AppSensa"nın təhlilinə görə, tətbiqdəki kodlar istifadəçilərə fiziki və virtual kartları ayrı-ayrılıqda idarə etməyə imkan verir.
"X"in ödəniş infrastrukturunu genişləndirmək üçün təkcə "Visa" ilə deyil, "Mastercard"və "American Expres"s kimi qlobal ödəniş nəhəngləri ilə də danışıqlar apardığı anlaşılır. Beləliklə, "X" öz ödəniş sistemlərində daha əhatəli və rəqabətədavamlı bir quruluşa nail olmağı hədəfləyir.
"X" ödəniş sistemləri sahəsində fəaliyyət göstərmək üçün ABŞ-da lisenziyalar almağa davam edir. 2023-cü ilin sonuna qədər 12 ştatda lisenziyası olan şirkət, hazırda Vaşinqton da daxil olmaqla bu sayı 40-a çatdırıb. Şirkətin məqsədi bütün ABŞ-da xidmət göstərməkdir.
Elon Musk "X" sosial media platformasını - ödəniş sistemləri, rəqəmsal bankçılıq, investisiya və birja ticarətini özündə birləşdirən “super proqramaya” çevirmək istəyir. Maskın 1999-cu ildə qurduğu X.com -un PayPal-a çevrilməsi və 2017-ci ildə domen adını geri alması bu günə çatdığı nöqtədə diqqətəlayiq prosesin bir hissəsi hesab olunur.
"X Money" və onun kart xidmətlərinin nə vaxt istifadəyə veriləcəyi ilə bağlı konkret bir tarix yoxdur, lakin bu ilin sonunda bunun elan ediləcəyi gözlənilir. (Marja)
