«Apple» şirkəti bu ilin ilk böyük təqdimetmə mərasimində yeni «iPhone 12» smartfonlarını açıqlayıb.
FED.az xəbər verir ki, 12 sırasına daha 3 smartfon – «iPhone 12 mini», «iPhone 12 Pro» və «iPhone 12 Pro Max» da daxildir. Gözlənildiyi kimi, yeni modellərin əsas xüsusiyyyəti onların 5G şəbəkəsində işləməsidir.
Onların yaddaşı 64 QB, 128 QB və 256 QB olacaq.
Bundan başqa, smartfonların xarici görünüşü də dəyişdirilib – indi onlar ilk «iPhone»ları xatırladırlar – bundan əlavə, yeni daha güclü prosessor və ekranla təmin ediliblər. Belə ki, onlarda 6 nüvəli «Apple A14» prosessoru yerləşdirilib. Bunlar «A13»-dən 50% güclüdür.
Belə ki, smartfon OLED-displey və yeni çox möhkəm «Ceramic Shield» ekranı ilə təmin edilib. Ekran şüşəsi çox möhkəm olması üçün keramika ilə gücləndirilib.
«iPhone 12» əvvəlki modeldən 11% nazik, 15% kiçik və yüngüldür.
Smartfonun dizaynı düz kənarlarına görə «iPhone 4» və «iPhone 5»i xatırladır. Ölçülərə gəlincə, «iPhone 12 mini»nin diaqonalı 5,4 düym, «12» və «12 Pro»da 6,1 düym, «Pro Max»da isə 6,7 düym olacaq.
«iPhone 11»də olduğu kimi «iPhone 12»də də ikiqat kamera olacaq. «iPhone 12 Pro Max» isə telefonto çəkiliş üçün 3-cü kameraya da malik olacaq.
Bundan başqa, yeni telefonlarda «Smart HDR 3» funksiyası olacaq, bu işıq mənbəyinə qarşı (məsələn, üzü günəşə və ya adi elektrik lampalarına qarşı) çəkiliş aparmağa imkan verir.
«iPhone 12» və «iPhone 12 mini» modjelləri 5 rəngdə – qara, ağ, qırmızı, yaşıl və göy rənglərdə olacaq. «iPhone 12 Max Pro»lar isə gümüşü, qara, qızılı və göy rəngdə olacaq.
«iPhone 12»nin qutusunda daha adapter və qulaqcıq olmayacaq – yalnız kabel və smartfonun özü olacaq.
«iPhone 12 mini» öz funksiyalarına görə «iPhone 12»dən fərqlənmir, yalnız ekranı kiçikdir – cəmi 5,4 düym. Bu – dünyada ən kiçik 5G-smartfondur. O 4,7 düymlük köhnə «iPhone»lardan həm kiçik, həm də yüngüldür.
«iPhone 12 mini»nin qiyməti $699-dan, «iPhone 12» $799-dan başlayır.
«iPhone 12 Pro» və «iPhone 12 Pro Max» isə 128 QB, 256 QB və 512 QB yaddaşla təqdim edilib. Bu smartfonlar cərrah poladından və «Ceramic Shield» şüşəsindən hazırlanıb.
«iPhone 12 Pro»nin qiyməti $999-dan, «iPhone 12 Pro Max» $1099-dan başlayır.
