Rəqəmsal İnkişaf və Nəqliyyat Nazirliyinin tabeliyində olan “AzInTelecom” MMC Türkiyənin qabaqcıl texnologiya şirkətlərindən olan “Çekino Group”la birlikdə Bakıda “Son istifadəçi təhlükəsizliyinin idarəedilməsi” mövzusunda konfrans keçirib.

SİMA Elm və Təhsil Nazirliyinin sisteminə - İNTEQRASİYA EDİLDİ

FED.az xəbər verir ki, dövlət qurumları və özəl şirkətlərin informasiya təhlükəsizliyi üzrə məsul şəxsləri və mütəxəssislərinin iştirak etdiyi konfrans son istifadəçi təhlükəsizliyi riskləri, risklərə qarşı preventiv və cavab tədbirlərinin görülməsi, ümumilikdə son istifadəçi təhlükəsizliyinin təmin olunması mövzularını əhatə edib.

Giriş sözü ilə çıxış edən “AzInTelecom”un Kommersiya departamentinin direktoru Fərrux Fərəcullayev bildirib ki, ölkənin bir sıra böyük şirkət və dövlət qurumlarının informasiya resurslarını etibar etdiyi “AzInTelecom”un fəaliyyət istiqamətləri Azərbaycan və xarici ölkələr arasında beynəlxalq səs trafiki mübadiləsinin təşkili, bulud xidmətləri, mərkəzləşdirilmiş informasiya sistemləri və biznes həllərdən ibarətdir.

Azərbaycan Kibertəhlükəsizlik Təşkilatları Assosiasiyasının sədri Elvin Balacanov kibertəhlükəsizliyin artıq bütün şirkətlər üçün ən vacib nüanslardan birinə çevrildiyini və bu sahədə fəaliyyət göstərən qurumların kompakt əməkdaşlığının vacibliyini vurğulayıb.

“AzInTelecom”un İnformasiya təhlükəsizliyinin təşkili şöbəsinin müdiri Kamran Kərimli son istifadəçi təhlükəsizliyinin risklərinə daxil olan gündəlik fəaliyyət zamanı qarşılaşdığımız potensial təhlükələrdən danışıb.

“AzInTelecom”un İnformasiya təhlükəsizliyi üzrə məhsul sahibi Arzu Rəhimli qeyd edib ki, risklərə qarşı qabaqlayıcı və müdaxilə tədbirlərinin görülməsi aparıcı rol oynayır. Dövlət qurumları və özəl şirkətlərə informasiya təhlükəsizliyinin auditi, konsaltinqi, kibertəhlükəsizlik və Təhlükəsizlik Əməliyyat Mərkəzi (SOC) xidməti göstərən “AzInTelecom” MMC-nin də bu sahədə davamlı işlər gördüyünü vurğulayan Arzu Rəhimli yerli və xarici şirkətlərlə mütəmadi olaraq məlumat mübadiləsi aparıldığını da vurğulayıb.

“Çekino Group”un baş direktorunun müavini Arzu Car iştirakçılara şirkət haqqında məlumat verib. Bildirib ki, “Çekino Group” informasiya texnologiyaları şirkəti olaraq, proaktiv və kontekst əsaslı texnologiyalar, məlumat mərkəzli inteqrasiya olunmuş həllər və uzunmüddətli təcrübəsi sayəsində aparıcı texnologiya şirkəti olmaq yolunda mühüm addımlar atmaqdadır.

“Çekino Group”un baş direktoru Erol Yılmaz konfrans zamanı sistem, son istifadəçi və təhlükəsizlik mövzusunda çıxış edərək şirkətin yaratdığı “Gardiyan” məhsulu barədə danışıb.

E.Yılmaz qeyd edib ki, bu məhsul böyük şəbəkələrdə bütün sistemin əvvəldən sona kimi təhlükəsiz monitorinqini və idarə olunmasını təmin edən, korporativ strategiyaya uyğun olaraq sistem idarəçilərinə məlumat verən və problemlərə qarşı sürətli şəkildə lazımi qabaqlayıcı tədbirlərin alınmasına imkan yaradan rəqəmsal həldir.

İstanbul Böyükşəhər Bələdiyyəsinin İnformasiya emalı şöbəsinin rəhbəri Erol Özgüner bələdiyyənin tərkibində 4 dövlət qurumunun olduğunu və ümumilikdə 53 mindən çox şəxsin çalışdığını diqqətə çatdırıb. Həmçinin “Gardiyan” məhsulu sayəsində şirkətdaxili şəbəkələrdə sistemin təhlükəsiz monitorinq və idarə olunduğunu, məhsul sayəsində risklərə qarşı qabaqlayıcı tədbirlərin görüldüyünü deyib.

Tədbir zamanı həvəsləndirici müsabiqə təşkil olunaraq fərqlənən 10 iştirakçı mükafatlandırılıb.