Amerikanın Apple şirkəti iki həftə əvvəl satışa çıxarılan bu modelə tələbat az olduğu üçün iPhone 14 smartfonlarının istehsalını artırmamaq qərarına gəlib.
Eləcə də bax: Yeni “iPhone”lar Azərbaycana - NƏ VAXT GƏLƏCƏK? - QİYMƏT
FED.az xəbər verir ki, bu barədə çərşənbə günü Bloomberg agentliyi məlumat yayıb.
Məlumata görə, şirkət bu ilin ikinci yarısında iPhone 14 smartfonlarının istehsalını 6 milyon ədəd artırmayacağı barədə komponent təchizatçılarını xəbərdar edib. İlin sonuna qədər şirkət 90 milyon cihaz buraxmaq niyyətindədir ki, bu da əvvəlki illə "təxminən eynidir".
Bloomberg-in məlumatına görə, dünyanın ən böyük smartfon bazarı olan Çin smartfon bazarında satışa çıxarıldıqdan sonra ilk üç gündə iPhone 14 alışları keçən ilki iPhone 13-dən 11% az olub. Agentlik qeyd edir ki, qlobal smartfon bazarının bu il 6,5% azalaraq 1,27 milyard ədədə düşəcəyi gözlənilir.
Bazar ertəsi Dehlidə yerləşən "Hindustan Times", Apple-ın Hindistanda iPhone 14 istehsalına başladığını bildirib. Şirkət uzun müddətdir ki, smartfonlarının əksəriyyətini Çində istehsal edir, lakin ABŞ və Çin hökumətləri arasında münasibətlərin mürəkkəbləşməsi səbəbindən alternativlər tapmağa çalışırdı.
ABŞ-da iPhone 14 və iPhone 14 Plus müvafiq olaraq 799 və 899 dollara satılır.
1976-cı ildə qurulan Apple şirkəti smartfonlar, iPad, iMac, MacBook və digər yüksək texnologiyalı məhsullar istehsal edir. Onun bazar kapitallaşması, Nasdaq-a görə, hazırda 2,42 trilyon dollardır. (Marja)
