Nüfuzlu insayder Majin Bu, X (keçmiş Twitter) sosial şəbəkəsindəki səhifəsində qarşıdan gələn iPhone SE 4-ün adının iPhone 16E olaraq dəyişdirildiyini elan edib.
FED.az xəbər verir ki, mənbə Apple-ın 2025-ci ildə iPhone 16E-ni təqdim etmək planlarını təsdiqləyib. Onun sözlərinə görə, qurğu iPhone 14-ə bənzər dizayna, OLED displeyə və səssiz rejim açarı əvəzinə fəaliyyət düyməsinə malik olacaq. Telefon ağ və qara rənglərdə təklif olunacaq.
Eyni zamanda, Majin Bu "iPhone 16E" üçün korpusun renderlərini dərc edib, ondan smartfonun bir kamera ilə təchiz ediləcəyini və hərəkət düyməsinə malik olacağını başa düşmək olar.
iPhone SE-nin nömrəsinin dəyişməsi Samsung-un yanaşmasını xatırladır. Belə ki, koreyalılar əvvəl flaqman, altı aydan sonra isə daha sərfəli versiya buraxırlar.
Yeni iPhone 16E-nin təqdimatı 2025-ci ilin martında gözlənilir. Şayiələrə görə, yeni məhsul 499 dollar qiymətində təklif olunacaq ki, bu da əsas iPhone 16-dan 300 dollar ucuzdur.
