Şirkətin 1 milyon manatdan artıq vəsaitini mənimsəməkdə təqsirləndirilən Orxan Məmmədov, Zaur Babayev, Cəbrayıl Cəbrayılov, Fuad Xəlilzadə və Murad Rəsulovun cinayət işi üzrə məhkəmə prosesi keçirilib.
“Qardaşımla birgə 16 milyon vermişik” - Tale Heydərovun ifadəsi oxundu
FED.az xəbər verir ki, hökmə əsasən, hər biri 2 il müddətinə dövlət və yerli özünü idarə orqanlarında maddi və rəhbər vəzifə tutmaq hüququndan məhrum edilməklə Orxan Məmmədov və Zaur Babayev 8 il, Cəbrayıl Cəbrayılov, Murad Rəsulov və Fuad Xəlilzadəyə 5 il müddətinə azadlıqdan məhrum etmə cəzası təyin edilib. Fuad Xəlilzadə və Cəbrayıl Cəbrayılovun cəzası şərti hesab edilib.
Dövlət ittihamçısı Orxan Məmmədovun 11 il, 6 ay, Zaur Babayevin 11 il, Cəbrayıl Cəbrayılov və Fuad Xəlilzadənin 7 il, Murad Rəsulovun 8 il müddətinə azadlıqdan məhrum edilməsini təklif edib.
Qeyd edək ki, ittihama görə, Orxan Məmmədov “İnteqral” QSC-nin məişət əşyalarının və texnikasının topdan satış kateqoriya üzrə menecer vəzifəsində işləyib.
O, qulluq mövqeyindən istifadə edərək ona etibar olunmuş özgə əmlakını talama məqsədilə 2019-cu ilin yanvar ayından başlayaraq QSC-nin məişət əşyalarının və texnikasının topdan satış şöbəsində sürücü-ekspeditor vəzifəsində işləyən Zaur Babayevlə qabaqcadan əlbir olub cinayət əlaqəsinə girərək malların satışından əldə olunan pul vəsaitlərini cəmiyyətin xəzinəsinə ödəməyərək öz aralarında bölmək barədə razılığa gəliblər.
Bununla da onlar ümumilikdə 168 min 460 manat pulu aralarında bölüblər.
Orxan Məmmədov 2021-ci ilin yanvar ayından başlayaraq Zaur Babayevlə və əvvəllər tanıdığı QSC ilə ticarət əlaqələrində olan Murad Rəsulovla qabaqcadan əlbir olub cinayət əlaqəsinə girib. O, cinayətin törədilməsinə rəhbərlik etməklə ayrı-ayrı dilerlərdən sifariş kimi qəbul olunan və həmin dilerlərə çatdırılması təşkil edilməyərək malların Murad Rəsulovun vasitəsi ilə satışını həyata keçirərək satışdan əldə olunan pul vəsaitlərini öz aralarında bölmək barədə razılığa gəlib. Nəticədə Orxan Məmmədov, Zaur Babayev və Murad Rəsulov “İnteqral” QSC-yə məxsus 525 min 547 manat pulunu mənimsəyib.
İttiham aktında göstərilib ki, təqsirləndirilən Cəbrayıl Cəbrayılov “İnteqral” QSC-nin məişət əşyalarının və texnikasının topdan satış şöbəsində ekspeditor vəzifəsində çalışıb. Onunla birgə ekspeditor vəzifəsində işləyən Fuad Xəlilzadə və Cəmiyyətin məişət əşyalarının və texnikasının topdan satış şöbəsinin müdir müavini vəzifəsini icra edən Orxan Məmmədov ilə qabaqcadan əlbir olub malların satışından əldə olunan pul vəsaitlərini şirkətin xəzinəsinə ödəməyərək öz aralarında bölmək barədə razılığa gəliblər.
Nəticədə Cəbrayıl Cəbrayılov, Fuad Xəlilzadə və Orxan Məmmədov “İnteqral” QSC-yə məxsus ümumilikdə 763 min 80 manat pulunu mənimsəmə yolu ilə ələ keçiriblər. Şirkətin sabiq əməkdaşları “İnteqral” QSC-nin 1 457 088 manat pulunu mənimsəyiblər.
Orxan Məmmədov və Zaur Babayevə qarşı Cinayət Məcəlləsinin (CM) 179.4-cü (Mənimsəmə və ya israf etmə, xüsusilə külli miqdarda mənimsəmə) və 313-cü (vəzifə saxtakarlığı) maddələri ilə, Cəbrayıl Cəbrayılov, Fuad Xəlilzadə və Murad Rəsulova isə CM-nin 179.3.2-cü (külli miqdarda mənimsəmə) və 313-cü (vəzifə saxtakarlığı) maddələri ilə ittiham irəli sürülüb.
Həmin şəxslər 2022-ci ilin dekabrında hüquq-mühafizə orqanlarının əməkdaşları tərəfindən saxlanılıb.
