Mediasiya Şurasının İdarə Heyətinin sədri Nadir Adilovun sözlərinə görə, Mediasiya Şurasının İdarə Heyətinin təşəbbüsü ilə Şuranın növbəti və 2023-cü il dövrü də auditə ediləcək.
FED.az xəbər verir ki, o qeyd edib ki, növbəti audit bu işin öncədən həvalə edildiyi "ABAK-Az Crowe Ltd" Audit şirkəti tərəfindən kompleks şəkildə həyata keçiriləcək. Onun sözlərinə görə, “Bizim İdarə Heyətindəki müzakirələrimiz və eyni zamanda Mediasiya Şurasının Daxili Audit Komitəsinin də mövqeyinin üst - üstə düşməsi bizi sevindirir. N. Adilov qeyd edib ki, bildiyiniz kimi Mediasiya Şurasında Daxili Audit Komitəsi fəaliyyət göstərir və qeyd edilən komitə Şura da daxil olmaqla, bütün mediasiya təşkilatları və mediatorların fəaliyyətlərini İdarə Heyətinin qərarı əsasında daxili audit etmək səlahiyyətindədir. Amma biz eyni zamanda, Mediasiya Şurasının fəaliyyətində şəffaflığın təmin edilməsi məqsədi ilə kənar və nüfuzlu auditorların və nüfuzlu audit şirkətinin iştirakı ilə audit etməyə də qərar verdik. N. Adilov qeyd edib ki, mediasiya proseslərinin məxfiliyini qorumaq şərti ilə, mediasiya islahatları geniş ictimai mahiyyət daşıdığından bu sahə cəmiyyət üçün açıq və şəffaf olmalıdır. “Eyni zamanda, mediasiya islahatları sahəsində ictimai nəzarətin mediasiya proseslərinin məxfiliyi qorunmaq şərti ilə təmin olunması əsas məqsədlərimizdən biridir.”
Nadir Adilov eyni zamanda Mediasiya Təşkilatlarının ictimai maraqlara xidmət edən təşkilatlar olduğunu qeyd edərək, mediasiya proseslərinin məxfiliyinin qorunması şərti ilə bütün mediasiya təşkilatlarının də cəmiyyətə açıq və şəffaf olmalı olduğunu qeyd edib. O qeyd edib ki, mediasiya təşkilatlarının fəaliyyəti üzərində hər zaman ciddi nəzarət tədbirləri həyata keçirilib və bu tədbirlər bundan sonra da həyata keçiriləcək.
Qeyd: Mediasiya Şurasının fəaliyyətini audit edəcək şirkət - ABAK-Az CROWE Ltd. (bundan sonra Crowe) Azərbaycanda fəaliyyət göstərən beynəlxalq professional audit şirkətlərindən biridir. Yarandığı dövrdən etibarən biznesin inkişafına yardım etməklə bərabər, Crowe özünün audit və mühasibat xidmətləri portfelini genişləndirmiş və beləliklə, getdikcə mürəkkəbləşən işgüzar mühitin tələblərinə uyğunlaşmışdır. Crowe`un ciddi və peşəkar əməkdaşları yerlərdə və beynəlxalq miqyasda ayrı-ayrı şəxslərdən şirkətlərə, ticarət evlərindən böyük şirkətlər qrupuna, hökümətlərdən beynəlxalq qurumlara kimi geniş müştəri dairəsinin tələblərinə uyğun xidmətlər göstərir.
ABAK-Az Crowe Ltd. Crowe Globalın üzvüdür. Beynəlxalq audit qurumları arasında 9-cu yeri tutan və dünyanın 130 ölkəsində təmsil olunan 200 müəssisənin əhatə olunduğu Crowe Globala üzv olmaq məsuliyyəti şirkətin mütəxəssislərini öz professional səviyyələrini daim yüksəltməyə ruhlandırır.
“Crowe” Bakıda öz fəaliyyətinə 1997-ci ildə idarəetmə üzrə konsaltinq şirkəti kimi başlamışdır və 2003-cü ildən Azərbaycan Respublikası Auditorlar Palatasının üzvüdür.
Crowe Beynəlxalq Mühasibat Standartları, Beynəlxalq Audit Standartları və Azərbaycan Respublikasının müvafiq qanun və qaydaları üzrə daxili audit, müstəqil illik audit, dövri idarəetmə hesabları, Azərbaycan müəssisələrinin illik hesabatlarının Beynəlxalq Maliyyə Hesabat Standartları üzrə transformasiyası, ənənəvi və avtomatlaşdırılmış mühasibat xidmətləri, mühasibat sistemləri və daxili uçotun qurulmasının təhlili və tövsiyyələr, mühasibat proqramları üzrə tövsiyyələr vermək kimi xidmətlərin Azərbaycanda yerinə yetirilməsi üçün müvafiq icazəsi vardır.
