Hüquq

İşdən çıxarıldığı şirkətdən - 50 MİN TƏLƏB EDİR

İşdən çıxarıldığı şirkətdən - 50 MİN TƏLƏB EDİR | FED.az
10:10 4 Sen 2020

“Azsığorta” ASC-nin işdən çıxarılan əməkdaşı şirkəti məhkəməyə verərək 50 min manatdan çox pul tələb edib.

Eləcə də bax: “Aqrolizinq”in vəzifəli əməkdaşı - Həbs Edildi

FED.az xəbər verir ki, Seymur Babayev bildirib ki, 2016-cı ildən başlayaraq “Azsığorta”nın Şirvan Muğan filialının satış nümayəndəsi vəzifəsində işləyib: “2020-ci ilin yanvarında guya müqavilələri elektron informasiya sisteminə vaxtlı-vaxtında yerləşdirmədiyimə görə işdən çıxarıldım. Amma mənimlə şirkət arasında olan işəgötürmə müqaviləsində əmək öhdəliklərimdə müqavilələrin sistemə vurulması haqda heç bir şərt, bənd yoxdur. Bu, mənim öhdəliyimdə olan məsələ olmayıb. Müqavilələr ofisdə sistemə vurulurdu. Mən isə satış mütəxəssisi kimi müştəri cəlb edirdim”.

S.Babayev iddia edib ki, şirkətin dediyi nöqsanlara görə işdən azad edilməsi onun pandemiya dövründə heç bir yerdə iş tapa bilməməsinə səbəb olub: “2019-cu ilin son aylarında “Azsığorta”nın Təhlükəsizlik Xidmətinin direktoru Çingiz Məhərrəmov mənim barəmdə qeyri-qanuni yoxlamalara başladı. Qorxutmaq, qanunsuz etiraf almaq, törətmədiyim əmələ görə cəzalandırmaq məqsədilə Çingiz Məhərrəmov mənə güclü psixi iztirablar verirdi. Bundan başqa barəmdə toplanılan və aparılan yoxlama sənədləri ilə tanış olmağıma şərait yaradılmadı. Sonda əsassız olaraq Əmək Məcəlləsinin 70-ci maddəsinin “ç” bəndinə əsasən tutduğum vəzifədən azad edildim. Əmrin məzmununda “əmək vəzifələri üzrə yol verdiyi ciddi nöqsanlara görə” işdən çıxarılmağım qeyd olunub”.

S.Babayev əmrin ləğvi üçün məhkəməyə üz tutub, Yasamal rayon Məhkəməsi onun şikayətini təmin etməyib: “Hazırda işə Bakı Apelyasiya Məhkəməsində baxılır. Amma hakim Xəyalə Cəmilova indidən işə qərəzli yanaşır, proseslərdə “Azsığorta”nın tərəfini saxlayır, mənim çıxış etməyimə imkan vermir. Buna görə də sonuncu iclasda çıxışımı yarımçıq kəsdiyi üçün işə başqa hakimin baxması barədə məhkəmə sədrinə etiraz verdik. Mənim barəmdəki əsassız əmrin ləğv edilməsi, işə bərpa olunmağım, məcburi iş buraxmaya görə hesablanılmış əmək haqqı və vurulmuş mənəvi zərərin əvəzi kimi 50 000 ödənilməsini tələb edirəm”.

Cavabında “AZSIGORTA” ASC də öz qalmaqallı işçisi barədə məlumat yayıb. 
«AZSIGORTA» ASC-dən FED.az-a evrilən məlumatda isə bildirilir ki, 2016-cı ildən şirkətin Şirvan-Muğan filialında satış nümayəndəsi kimi fəaliyyət göstərən S.Babayevin müştərilərlə dəfələrlə ciddi mübahisələrinin olması faktı aşkarlanıb. 
«Sığortalının şikayəti əsasında  S. Babayevin müştərilərlə rəftarı və bağladığı müqavilələr yoxlanılıb. Müəyyən edilmişdir ki, Seymur Babayev Daşınmaz əmlakın İcbari Sığortası müqavilələri və eləcə də Əmlakın yanğından və digər əlavə risklərdən sığortası növü üzrə sığorta müqavilələri bağlayarkən əmək müqaviləsi ilə müəyyən edilmiş öhdəliklərini yerinə yetirməmiş, sığorta məhsullarının satışını həyata keçirərkən sığortalıların ciddi narazılığına səbəb olan  kobud pozuntulara yol vermiş, Cəmiyyətin nüfuzuna ciddi ziyan vurmuşdur».  
«AZSIGORTA» ASC  bildirir ki, sığortalının şikayəti və araşdırmanın nəticəsi nəzərə alınaraq, S.Babayev Azərbaycan Respublikası Əmək Məcəlləsinin 70-ci maddəsinin “ç” bəndinə əsasən tutduğu vəzifədən azad edilmişdir. 
"Qeyd edək ki, sözügedən əməkdaş əmrin ləğvi, işə bərpa, maddi və mənəvi zərərin əvəzininjn ödənilməsi barədə iddia ərizəsi ilə Bakı şəhəri Yasamal Rayon Məhkəməsinə müraciət etmişdir. Bakı şəhəri Yasamal Rayon Məhkəməsinin 2(004)-1720/2020 saylı qətnaməsi ilə iddiaçı Babayev Seymur Nizami oğlunun iddia tələbi əsassız olduğundan  təmin edilməmişdir. İddiaçı iddia tələbi üzrə Apelyasiya  şikayəti vermişdir"-deyə şirkətdən FED.az-a bildirilib. 

Digər xəbərlər