Banner

Hüquq

Azərbaycanda 4 vəkilin fəaliyyətinə xitam verilib - TOPLANTI

Azərbaycanda 4 vəkilin fəaliyyətinə xitam verilib - TOPLANTI | FED.az
13:52 7 Sen 2018

Azərbaycanda 4 vəkilin fəaliyyətinə xitam verilib.

Vəkillər Kollegiyasından FED.az-a verilən məlumata görə, bununla bağlı qərar qurumun sentyabrın 7-də keçirilən iclasında qəbul edilib. 

İclasda kollegiyanın sədri Anar Bağırov son dövrlər Rəyasət Heyəti tərəfindən görülən işlərin vəziyyəti barədə məlumat verib. Bundan başqa, yeni vəkil qurumlarının təsis olunması ilə bağlı qərarlar qəbul edilib. Belə ki, Salyan rayonunda yeni vəkil bürosu, Bakıda 20 saylı və “LCG” vəkil bürolarının təsis olunması barədə məsələlərə baxılıb. Bu müraciətlərlə əlaqədar Rəyasət Heyəti tərəfindən müsbət qərarlar verilib.

Eyni zamanda, başqa vəkil qurumuna keçmək, fərdi qaydada fəaliyyət göstərmək və vəkilliyə qəbul üzrə müraciətlərə də baxılıb, bir sıra vəkillərin mükafatlandırılması haqqında qərarlar qəbul edilib.

“Vəkillər və vəkillik fəaliyyəti haqqında” Qanunun tələbinə əsasən, hüquq üzrə elmlər doktoru dərəcəsi olan şəxslərin Vəkillər Kollegiyasına vəkil andı içərək birbaşa qəbul edilməsi proseduruna uyğun olaraq, Bakı Dövlət Universitetinin cinayət prosesi kafedrasının müdiri, tanınmış hüquqşünas, hüquq elmləri doktoru Firuzə Abbasova Vəkillər Kollegiyasının üzvlüyünə qəbul olunub. 

İclasda vəkillər barəsində başlanılmış 24 intizam icraatı üzrə Vəkillərin İntizam Komissiyasının rəylərinə baxılaraq, peşə borcunun həyata keçirilməsi ilə bağlı qanunvericilik aktlarının tələblərinin, vəkillərin davranış qaydaları haqqında əsasnamənin, o cümlədən vəkil etikası normalarının pozuntusu əsası ilə 7 vəkil barəsində intizam tənbeh tədbiri seçilib. Xüsusilə, vəkil etikasına riayət etmədiyinə görə 1 vəkilə irad tutulub.

Həmçinin ədalət mühakiməsinin lazımi qaydada həyata keçirilməsinə maneçilik törətmələrinə və məhkəmə prosesi iştirakçılarına münasibətdə nəzakətsiz davrandıqlarına görə iki vəkilə töhmət verilib. Müqavilə bağlamadan hüquqi yardım göstərdiyinə, müdafiə hüququnun pozuntusuna yol verdiklərinə və ədalət mühakiməsinin lazımi qaydada həyata keçirilməsinə maneçilik törətmələrinə görə 4 vəkilin fəaliyyətinin dayandırılması barədə qərar qəbul olunub. Digər işlər üzrə isə pozuntu aşkar edilmədiyi üçün intizam icraatına xitam verilib. 

Daha sonra 700 bal toplayaraq Azərbaycan Respublikasının Prezidenti yanında Dövlət İdarəçiliyi Akademiyasının hüquq fakültəsinə daxil olmuş birinci kurs tələbəsi Şahxanım Həsənovaya Vəkillər Kollegiyası Rəyasət Heyəti tərəfindən təsis edilmiş “Əlimərdan bəy Topçubaşov” adına təqaüdün verilməsi qərara alınıb. Qeyd edək ki, Şahxanım Həsənova haqqında məlumat “Facebook” şəbəkəsindən əldə olunub.

Sonda Kollegiyanın fəaliyyətinə dair digər məsələlər ətrafında müzakirələr aparılıb, müvafiq qərarlar qəbul olunub.

Digər xəbərlər

Banner