Ağ Ev bugündən etibarən Çindən idxal olunan mallara tariflərin 104 faizə qaldırılacağını açıqlayıb. Bu barədə ABŞ Prezidenti Donald Tramp sərəncam imzalayıb.
Çin ABŞ məhsullarına 34 faiz gömrük rüsumu tətbiq edəcək
FED.az xəbər verir ki, Ağ Evin sözçüsü Karoline Leavitt, Çinin müqavilə bağlamaq istədiyini, sadəcə bunu necə başlayacağını bilmədiyini söyləyib və əlavə edib: "Əgər Çin bizimlə razılaşsa, Tramp lütfkar davranacaq".
Ağ Evdən verilən açıqlamaya görə, ABŞ Çindən idxal olunan mallara 34% gömrük rüsumu (tarif) tətbiq etdikdən sonra, Çinin də ABŞ-dan idxal olunan məhsullara 34%-lik cavab rüsumunu ləğv etməməsindən sonra əlavə 50% gömrük rüsumu tətbiq edilib, əvvəlki 20%-lik və 34%-lik tariflər daxil cəmi tarif dərəcəsi 104%-ə çatıb.
Leavitt deyib ki, Tramp Çinin ABŞ-la müqavilə bağlamaq istədiyinə inanır və ölkə bu müqaviləni bağlamalıdır: "Çin əlini uzatsa, Tramp yumşaq davranacaq".
Leavitt bildirib ki, aprelin 2-də ABŞ tərəfindən tariflər açıqlanandan bəri 70-ə yaxın ölkə danışıqlara başlamaq üçün prezident Trampla əlaqə saxlayıb: “Ölkələr ədalətsiz ticarət təcrübələrini düzəltmək və bazarlarını sərbəst şəkildə ölkəmizə açmaq üçün bir-biri ilə yarışır”.
Leavitt bildirib ki, Tramp bu səhər ticarət komandası ilə görüşüb və administrasiyasına razılaşmaq istəyən hər bir ölkə üçün uyğunlaşdırılmış ticarət sazişləri yaratmağı tapşırıb.
Tramp Çinə cavab olaraq 50 faiz rüsum tətbiq edəcəyi ilə hədələmişdi
ABŞ prezidenti Donald Tramp “qurtuluş günü” olaraq xarakterizə etdiyi 2 apreldə digər ölkələrə tətbiq olunacaq 10% - 50% aralığında tarif dərəcələrini açıqlayıb. Bu çərçivədə ABŞ-ın Çindən idxalına 34 faiz gömrük rüsumu tətbiq edilib. Çin ABŞ-ın tarif artımına reaksiya verən ilk ölkə olub və 34 faizlik tarif artımına cavab olaraq eyni nisbətdə əlavə tarif tətbiq edəcəyini açıqlayıb.
Tramp, Çinin tariflərə cavab olaraq elan etdiyi 34 faizlik gömrük rüsumlarını geri götürməməsi halında ölkəyə əlavə 50 faizlik gömrük rüsumunu tətbiq edəcəyini açıqlamışdı.
ABŞ prezidenti Tramp, daha əvvəl fevralın 1-də imzaladığı fərmanla Çindən idxala 10 faiz gömrük rüsumu tətbiq etmişdi, martın 4-də isə Çin üçün tarif dərəcəsini 20 faizə qaldırmışdı.
Bu sərəncamlardan sonra ABŞ-ın Çindən idxala tətbiq etdiyi tarif dərəcəsi 104%-ə çatır. (Marja)
