"OPEC+"ın (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs) gündəlik xam neft hasilatı üzrə mövcud kvotaların aprel ayında da davam etdirilməsi ilə bağlı qərarı gözlənilməz konservativ oldu.
Eləcə də bax: "Fitch" "Cənub Qaz Dəhlizi"nin reytinqini - "BB+" Səviyyəsində Təsdiqləyib
FED.az xəbər verir ki, bu barədə "Fitch" reytinq agentliyinin təbii sərvətlər və xam mallar üzrə qrupun direktoru Dmitri Marinçenko bildirib.
Onun sözlərinə görə, nəticədə, bu qərar neftə olan qiymətlərin hələlik 60-70 dollar civarında olmasına səbəb olacaq.
"“OPEC+”ın qərarı gözlənilməz konservativ oldu, bazarda, hələ ki, əhəmiyyətli defisit olacaq, bu da artıq neft ehtiyatlarının daha sürətli istifadə edilməsinə imkan verəcək. Yəqin ki, qiymətlər hələlik 60-70 dollar civarında qalacaq", - D. Marinchenko qeyd edib.
Qeyd edək ki, Azərbaycan "OPEC+" ölkələri nazirlərinin 14-cü iclasında gündəlik xam neft hasilatı üzrə mövcud kvotaların aprel ayında da davam etdirilməsi ilə bağlı əldə edilmiş razılaşmanı dəstəkləyib. Azərbaycan bu dəfə də pandemiyadan irəli gələn qeyri-müəyyənliklər şəraitində neft bazarında müsbət dinamikanın qorunub-saxlanılması məqsədilə "Əməkdaşlıq Bəyannaməsi" çərçivəsində neft istehsalçılarının konsensus əsasında fəaliyyətinin vacibliyini diqqətə çatdırıb.
Yeni qərara əsasən, Azərbaycanın apreldə öhdəliyi bu ilin I rübündə olduğu kimi – 123 min barel həcmində qalacaq. Gündəlik xam neft hasilatı isə apreldə də 595 min barrel səviyyəsində saxlanılacaq. "OPEC+" ölkələrinin gündəlik xam neft hasilatı üzrə ixtisarları isə apreldə 6,9 mln. barel təşkil edəcək.
Xatırladaq ki, Neft İxrac Edən Ölkələr Təşkilatına (OPEC) üzv və qeyri-üzv ölkələrin nazirlərinin ötən ilin dekabrında keçirilmiş 12-ci iclasında gündəlik xam neft hasilatının 2021-ci ilin yanvar ayında 0,5 mln. barel artırılması, "OPEC+" nazirlərinin hər ay keçiriləcək görüşləri vasitəsilə kvotaların qarşıdakı aylarda tədricən 2 mln. barelədək yumşaldılması razılaşdırılmışdı. Bu çərçivədə "OPEC+" ölkələri nazirlərinin 2021-ci ilin yanvar ayındakı 13-cü iclasında gündəlik xam neft hasilatının fevralda 7,125 mln. barel, martda isə 7,05 mln. barel azaldılmasına qərar verilib. (Apa)
